அதிமுக - பாஜக கூட்டணி இயல்பானது: எடப்பாடி பழனிசாமி

அதிமுக - பாஜக கூட்டணி இயல்பானது என்று எடப்பாடி கே.பழனிசாமி தெரிவித்தார்.

- 

கோவை, ஜூலை 7:

மக்களைக் காப்போம் - தமிழகத்தை மீட்போம்' என்ற 2026 தேர்தல் பிரசார சுற்றுப்பயணத்தை கோவை மாவட்டம், மேட்டுப்பாளையத்தில் அதிமுக பொதுச் செயலர் எடப்பாடி பழனிசாமி திங்கள்கிழமை தொடங்கினார்.

மேட்டுப்பாளையம் பேருந்து நிலைய பகுதியில் நடைபெற்ற தொடக்க நிகழ்வில் கலந்து கொண்டு எடப்பாடி பழனிசாமி பேசியதாவது:

நாட்டில் அவசரநிலையைக்கொண்டு வந்து மிசா சட்டத்தில் மு.க.ஸ்டாலினை கைது செய்த காங்கிரஸ் கட்சியுடன்தான் திமுக கூட்டணி வைத்திருக்கிறது. அதிமுக எங்கள் கட்சி, நாங்கள் யாருடன் வேண்டுமானாலும் கூட்டணி வைப்போம்.

தமிழ்நாட்டுக்கு நன்மை செய்யக்கூடிய பல்வேறு திட்டங்களை வழங்கி வரும் பாஜகவுடன் கூட்டணி வைப்பதில் என்ன தவறு? தேர்தல் நேரத்தில் எதிரிகளை வீழ்த்துவதற்காக கூட்டணி அமைக்கிறோம். அதிமுக - பாஜக கூட்டணி இயல்பான கூட்டணி, மக்களுக்கு நன்மை செய்யும் கூட்டணி.