முதுகலைப் பாடப்பிரிவுகள் இல்லாத ஜெயங்கொண்டம் அரசு கலைக் கல்லூரி!

அரியலூர் மாவட்டம், ஜெயங்கொண்டம் அரசு கலைக் கல்லூரியில் கூடுதலாக இளங்கலைப் பாடப்பிரிவுகளும் மற்றும் புதிதாக முதுகலைப் பாடப்பிரிவுகளும் தொடங்கப்படுமா என மாணவர்கள் உள்பட அனைத்துத் தரப்பினரும் எதிர்பார்க்கின்றனர்.

- நமது நிருபர்

அரியலூர், ஏப். 13:

ஜெயங்கொண்டம், ஆண்டிமடம், தா.பழூர் உள்ளிட்ட சுற்றுவட்டார மக்களின் கோரிக்கையையடுத்து கடந்த 2020-ஆம் ஆண்டு அரசுக் கலை மற்றும் அறிவியல் கல்லூரி தொடங்கப்படும் என்று அப்போதைய தமிழக முதல்வர் எடப்பாடி கே. பழனிசாமி அறிவித்தார்.

இதைத் தொடர்ந்து ஜெயங்கொண்டத்தில் இலையூர் சாலையிலுள்ள அரசு மேல்நிலைப் பள்ளியில், அதே ஆண்டிலேயே 250 மாணவர்களுடன் தொடங்கப்பட்ட இக்கல்லூரியில் தற்போது இளங்கலை தமிழ், ஆங்கிலம், வணிகவியல், கணிதம் மற்றும் கணினி அறிவியல் உள்ளிட்ட 5 பாடப்பிரிவுகள் மட்டுமே உள்ளன. இக்கல்லூரியில் ஜெயங்கொண்டம், தா.பழூர், உடையார்பாளையம், ஆண்டிமடம், செந்துறை, மீன்சுருட்டி, கடலூர் மாவட்டம், காட்டுமன்னார்குடி, சேத்தியதோப்பு, கும்பகோணம் அருகேயுள்ள திருப்பனந்தாள் உள்ளிட்ட பகுதிகளில் இருந்து 500-க்கும் மேற்பட்ட மாணவ, மாணவிகள் படித்து வருகின்றனர்.