நீர்நிலைகளின் பாதுகாவலன்..!

தஞ்சாவூர் மாவட்டத்துக்கு உள்பட்ட பேராவூரணி அருகேயுள்ள நாடியம் என்ற கிராமத்தைச் சேர்ந்தவர் முப்பத் தெட்டு வயது நிரம்பிய நிமல் ராகவன்.

- - சா. ஜெயப்பிரகாஷ்

துபையில் மின்னியல் பொறியாளராகப் பணியாற்றி வந்த நிமலன், கஜாபுயல் காலத்தில் ஊருக்கு வந்துள்ளார். புயலின் தாக்கத்தை நேரில் கண்டவுடன் நீர்ப் பிரச்னைகளையும், நீர் அரசியலையும், அவசியத்தையும் அறிந்தார். அதன்பின்னர், அவர் 'மெகா பவுண்டேஷன்' என்ற நீர்நிலைகள் பராமரிப்பு அமைப்பைத் தொடங்கி சிறப்பாக நடத்தி வருகிறார்.

புதுக்கோட்டை மாவட்டத்தின் பெரிய நீர்நிலையான கவிநாடு கண்மாயில் கடந்த ஆண்டு சீரமைப்புப் பணிகள் தொடங்கப்பட்டன. நகரின் நெருக்கமாயுள்ள 1,118 ஏக்கர் பரப்பளவுடைய இந்தக் கண்மாய் நிரம்பினால், மாவட்டத்தின் பெரும் பகுதிக்கு ஆண்டு முழுவதும் தண்ணீர் கிடைக்கும். நீண்டு விரிந்து செல்லும் இவரது நீர்நிலைகள் சீரமைப்புப் பணியில், நாடு முழுமைக்கும் 283 நீர்நிலைகளை தண்ணீருள்ளவையாக மாற்றியிருக்கிறது.

குஜராத் மாநிலத்தில் 'பெரிய உப்புப் பாலைவனம்' என்றழைக்கப்படும் கட்ச் மாவட்டத்தில் 12 நீர்நிலைகளை சீரமைத்திருக்கிறார் நிமல் ராகவன். தாய் மண்ணில் தொடங்கிய இந்தப் பயணம் கென்யாவிலும், இலங்கையிலும் நடைபெற்று வருகிறது.