10 ஆம் வகுப்பில் ஆங்கிலவழிக் கல்வி: 11 ஆம் வகுப்பில் தமிழ்வழிக் கல்வி?

பத்தாம் வகுப்பில் ஆங்கிலவழியில் பயின்று தேர்ச்சி பெற்ற அரசுப் பள்ளி மாணவர்கள், அதே ஆங்கிலவழிக் கல்விமுறையில் தாங்கள் விரும்பிய பாடங்களில் பதினோராம் வகுப்பில் சேரமுடியாமல் தவித்து வருகின்றனர்.

- சி.ஆர்.எம். சபரி

சேலம், மே 27:

சேலம் மாவட்டத்தில் சேலம் நகரம், சேலம் ஊரகம், சங்ககிரி, எடப்பாடி, ஆத்தூர் என 5 கல்வி மாவட்டங்கள் உள்ளன. இவை இணைந்த சேலம் வருவாய் மாவட்டத்தில் 160 அரசு மேல்நிலைப் பள்ளிகள் செயல்பட்டு வருகின்றன. இவற்றில், 10-க்கும் குறைவான பள்ளிகளில் மட்டுமே கணக்குப் பதிவியல், வணிகவியல், பொருளாதாரம், கணினி அறிவியல் பாடங்கள் அடங்கிய கலைப் பிரிவு ஆங்கிலவழியில் பயிற்றுவிக்கப்படுகிறது.

சங்ககிரி வட்டாரத்தில் சங்ககிரி அரசு ஆண்கள், பெண்கள் மேல்நிலைப் பள்ளி, நட்டுவம்பாளையம் அரசு மேல்நிலைப் பள்ளி, சின்னாகவுண்டனூர், வடுகப்பட்டி அரசு உயர்நிலைப் பள்ளி, மாதிரிப் பள்ளி, வைகுந்தம் அரசு மேல்நிலைப் பள்ளி, மகுடஞ்சவாடி முன்மாதிரி அரசு மேல்நிலைப் பள்ளி உள்பட சங்ககிரியை சுற்றியுள்ள அரசுப் பள்ளிகளில் 6 முதல் 10ஆம் வகுப்புவரை ஆங்கிலவழியில் மாணவர்களுக்கு பாடங்கள் கற்பிக்கப்பட்டு வருகின்றன.

ஆனால், இவற்றில் ஒன்றில் கூட மேல்நிலை வகுப்பு கலைப் பிரிவில் ஆங்கிலவழிக் கல்வி இல்லை என தெரியவருகிறது.