அஸ்ஸாம் அரசியலில் அந்நிய சக்திகளின் தலையீடு

காங்கிரஸ் மீது முதல்வர் பரபரப்பு குற்றச்சாட்டு

- 

குவாஹாட்டி, ஜூன் 20: பாஜக ஆளும் அஸ்ஸாமில் அடுத்த ஆண்டு பேரவைத் தேர்தல் நடைபெறவிருக்கும் நிலையில், 'மாநில காங்கிரஸுக்கு ஆதரவாக வங்கதேசம், பாகிஸ்தான் உள்ளிட்ட இஸ்லாமிய நாடுகளில் இருந்து 5,000-க்கும் மேற்பட்ட சமூக ஊடக கணக்குகள் இயக்கப்படுகின்றன; மாநில அரசியலில் முதல் முறையாக அந்நிய சக்திகளின் தலையீடு காணப்படுகிறது' என்று முதல்வர் ஹிமந்த விஸ்வ சர்மா பரபரப்பு குற்றச்சாட்டை முன்வைத்தார்.

தேசியப் பாதுகாப்பு தொடர்புடைய இந்த விவகாரம் குறித்து மத்திய அரசிடம் தான் எடுத்துரைத்துள்ளதாகவும் அவர் தெரிவித்தார்.

அஸ்ஸாம் மாநில காங்கிரஸ் தலைவராக, மக்களவை காங்கிரஸ் குழு துணைத் தலைவர் கௌரவ் கோகோய் கடந்த மாதம் நியமிக்கப்பட்ட நிலையில், முதல்வர் இக்குற்றச்சாட்டை முன்வைத்துள்ளார்.