கேரி, கவாஜா பங்களிப்பில் ஆஸ்திரேலியா 326/8

ஆஷஸ் தொடரின் 3-ஆவது டெஸ்ட்டில் ஆஸ்திரேலியா முதல் நாள் முடிவில் 8 விக்கெட்டுகள் இழப்புக்கு 326 ரன்கள் எடுத்துள்ளது.

- 

அதன் பேட்டர்களில் அலெக்ஸ் கேரி சதம் விளாசி ஸ்கோருக்கு பலம் சேர்க்க, உஸ்மான் கவாஜாவும் குறிப்பிடத்தக்க இன்னிங்ஸை பதிவு செய்தார். இங்கிலாந்து பௌலிங்கில் ஜோஃப்ரா ஆர்ச்சர் அசத்தினார்.

அடிலெய்டில் புதன்கிழமை தொடங்கிய இந்த ஆட்டத்தில் டாஸ் வென்ற ஆஸ்திரேலியா, பேட்டிங்கை தேர்வு செய்தது. அதன் டாப் ஆர்டரில், டிராவிஸ் ஹெட் 1 பவுண்டரியுடன் 10, ஜேக் வெதரால்டு 4 பவுண்டரிகளுடன் 18, மார்னஸ் லபுஷேன் 2 பவுண்டரிகளுடன் 19 ரன்களுக்கு ஆட்டமிழந்தனர்.

4-ஆவது பேட்டராக வந்த உஸ்மான் கவாஜா நிதானமாக பேட் செய்ய, கேமரூன் கிரீன் 2 பந்துகளில் டக் அவுட்டானார். அண்மையில் ஐபிஎல் ஏலத்தில் இவர் அதிகபட்ச விலையான ரூ.25.20 கோடிக்கு வாங்கப்பட்டது குறிப்பிடத்தக்கது.