மும்பையை புரட்டிப் போட்ட பலத்த மழை

சாலைகளில் வெள்ளம்; போக்குவரத்து ஸ்தம்பித்தது

- 

மும்பை, ஆக. 18: மகாராஷ்டிர மாநிலம், மும்பை நகரில் கடந்த மூன்று நாள்களாக தொடர்ந்து பெய்து வரும் பலத்த மழையால் மக்களின் இயல்பு வாழ்க்கை முற்றிலும் பாதிக்கப்பட்டுள்ளது.

மும்பை, தாணே, ராய்கட் ஆகிய மாவட்டங்களுக்கு இந்திய வானிலை மையம் 'சிவப்பு எச்சரிக்கை' விடுத்தது. மும்பையில் கடந்த திங்கள்கிழமை காலை முதல் பெய்துவரும் பலத்த மழையால் நகரின் முக்கிய சாலைகளில் வெள்ளம் பெருக்கெடுத்து ஓடியது.

அந்தேரி சுரங்கப்பாதை, லோகண்ட்வாலா காம்ப்ளக்ஸ், வகோலா பாலம், கார் சுரங்கப்பாதை போன்ற முக்கியமான பகுதிகளில் தண்ணீர் தேங்கியதால், போக்குவரத்து முற்றிலுமாக ஸ்தம்பித்தது.

மும்பை போக்குவரத்து காவலர்கள் உடனடியாக அந்தேரி சுரங்கப்பாதையை மூடி, வாகனங்களை மாற்றுப் பாதையில் திருப்பிவிட்டனர். இதனால், வாகனங்கள் நீண்ட வரிசையில் அணிவகுத்து, கடும் போக்குவரத்து நெரிசல் ஏற்பட்டது.