கல்வி நிலையங்களில் சுதந்திர தின விழா கொண்டாட்டம்

மதுரை மாவட்டத்தில் பள்ளி, கல்லூரி, பல்கலைக்கழகங்களில் 79-ஆவது சுதந்திர தின விழா வெள்ளிக்கிழமை கொண்டாடப்பட்டது.

- 

மதுரை, ஆக. 15:

மதுரை காமராஜர் பல்கலைக்கழகத்தின் சுதந்திர தின விழா, பல்கலைக்கழக வளாகத்தில் நடைபெற்றது. பல்கலை. பதிவாளர் எம். ராமகிருஷ்ணன் தேசியக்கொடி ஏற்றி வைத்து சிறப்புரை யாற்றினார். இதில், பேராசிரியர்கள், அதிகாரிகள், அலுவலகப் பணியாளர்கள், மாணவர்கள் கலந்து கொண்டனர். இந்த விழாவில், பல்கலை மாணவர்கள், அருளானந்தர் கல்லூரி, பாத்திமா கல்லூரி, லேடி டோக் கல்லூரி தேசிய நலப்பணித்திட்ட மாணவர்கள் கலந்து கொண்டு கலை நிகழ்ச்சிகளை நடத்தினர்.

மதுரை காமராஜர் பல்கலைக்கழகக் கல்லூரியில் நடைபெற்ற சுதந்திர தின விழாவில், கல்லூரி முதல்வர் (பொறுப்பு) பி. ஜார்ஜ் தேசியக்கொடியை ஏற்றி வைத்து சிறப்புரையாற்றினார். இந்த விழாவை, உடல்கல்வி ஆசிரியர் மதன் ஒருங்கிணைத்தார். இதில், பேராசிரியர்கள், அலுவலர்கள், மாணவ, மாணவிகள் கலந்து கொண்டனர். பேராசிரியர் பி. முருகேசன் நன்றி கூறினார்.