திருப்பரங்குன்றம் மலையில் ஆடு, கோழி பலியிடத் தடையில்லை

உயர்நீதிமன்றத்தில் அரசுத் தரப்பு தகவல்

- 

மதுரை, ஆக. 11: திருப்பரங்குன்றம் மலையில் ஆடு, கோழிகள் பலியிட எந்தவிதத் தடையும் இல்லை என சென்னை உயர்நீதிமன்ற மதுரை அமர்வில் திங்கள்கிழமை தமிழக அரசுத் தரப்பில் தெரிவிக்கப்பட்டது.

திருப்பரங்குன்றம் மலையில் ஆடு, கோழிகள் பலியிடவும், அசைவ உணவுகள் பரிமாறவும், நெல்லித்தோப்புப் பகுதியில் தொழுகை நடத்தவும் தடை விதிக்கக் கோரி, சோலைக்கண்ணன், ராமலிங்கம், பரமசிவம் ஆகியோரும், திருப்பரங்குன்றம் மலையை சமணர் குன்று என அறிவிக்கக் கோரி சுவஸ்தி ஸ்ரீ லட்சுமி சேனா பட்டாச்சார்ய மகா சுவாமியும், மலையின் மீதுள்ள சிக்கந்தர் தர்காவில் பராமரிப்பு, சீரமைப்புப் பணிகளை அனுமதிக்கக் கோரி அந்தத் தர்காவின் முதுநிலை மேலாண்மை அறங்காவலர் ஓசிர்கானும், தர்காவுக்கு வரும் பக்தர்களுக்குத் தேவையான அடிப்படை வசதிகளை உறுதி செய்யக் கோரி அப்துல் ஜப்பார் என்பவரும் சென்னை உயர்நீதிமன்ற மதுரை அமர்வில் மனுக்கள் தாக்கல் செய்தனர்.