மத்திய அரசின் சுற்றறிக்கை: இந்திய கப்பல் மாலுமிகள் தவிப்பு

நாட்டின் கடலோரப் பகுதியில் வசிக்கும் மக்கள் கடலையே தங்கள் வாழ்வாதாரமாகக் கொண்டு வசித்து வருகின்றனர். குறிப்பாக கப்பலில் பணியாற்றும் இந்திய மாலுமிகள் முக்கியமானவர்கள்.

- வை. இராமச்சந்திரன்

தூத்துக்குடி, ஆக. 10:

இந்திய பொருளாதார வளர்ச்சியில் முக்கியப்பங்காற்றும் கடல் சார் போக்குவரத்தில் பணியாற்றும் இவர்களுக்கு, அண்மையில் 'டிஜி ஷிப்பிங்' என்று அழைக்கப்படும் மத்திய கப்பல் போக்குவரத்து இயக்குநரகம் வெளியிட்ட சுற்றறிக்கை (31/2025) இவர்களின் வாழ்வாதாரத்தை நேரடியாகப் பாதிக்கும் வகையில் அமைந்துள்ளது.

இந்தப் புது சுற்றறிக்கையில், கப்பலில் பணியாற்றும் மாலுமிகள் சிறப்புப் பயிற்சி பெற்றதற்கான சான்றிதழ்களைச் சமர்ப்பிக்க வேண்டும். அதில், வெளிநாட்டு கல்வி நிறுவனங்கள் தரும் அனைத்துச் சான்றிதழ்கள் ஏற்கப்படாது என்று குறிப்பிடப்பட்டுள்ளது.

கடந்த ஜூலை 18-ஆம் தேதியிட்ட சுற்றறிக்கையின் படி, ஹோண்டுயூரஸ், பனாமா, டோகோ, கேபான், பெலிஸ், குக் தீவுகள் போன்ற வெளிநாடுகள் அளிக்கும் கடல்சார் தகுதிச் சான்றிதழ்கள் இனிமேல் இந்தியாவில் செல்லாது. இதனால், இந்த சான்றிதழ்கள் மூலம் வேலை செய்து வந்த ஆயிரத்துக்கும் மேற்பட்ட இந்திய மாலுமிகள் ஒரே இரவில் வேலை இழக்கும் நிலைக்குத் தள்ளப்பட்டுள்ளதாகக் கூறப்படுகிறது.

மீனவ சமுதாயத்தைச் சேர்ந்தவர்கள் வெளிநாடுகள் அளிக்கும் கப்பல் பணி சார்ந்த பயிற்சிகளைப் பெற்று மாலுமிகளாகப் பணியாற்றி வருகின்றனர்; பலர் தங்கள் தொழிலில் நிபுணர்களாகவும் உள்ளனர். ஆனால், மத்திய அரசின் சமீபத்திய சுற்றறிக்கையால் மாலுமிகள் பலர் வாழ்வாதாரத்தை இழக்கும் நிலை ஏற்பட்டுள்ளது.