பணியிடப் பாதுகாப்பை உறுதிப்படுத்துவோம்!

பணியாளர்களின் ஆரோக்கியம் என்பது உடல் நலம், மன நலம், சமூக அந்தஸ்துக்கான வருமானம் ஆகியவற்றின் ஆரோக்கியமான சூழலையே குறிக்கும். பல்வேறு அபாயங்களில் இருந்து தொழிலாளர்களின் பாதுகாப்புக்கும், ஆரோக்கியத்துக்கும் உத்தரவாதம் வழங்கப்பட வேண்டும்.

- நெல்லை சு.முத்து

பணியிடங்களில் பாதுகாப்பு மிகவும் அவசியமானது. தொழில்நுட்ப வளர்ச்சி அதிகரிக்க அதிகரிக்க பணியிடங்களின் பாதுகாப்பை அதைப் பயன்படுத்தி மேலும் வலிமையாக்க முடியும். அதேசமயம் புதிய தொழில்நுட்பங்களின் வருகை காரணமாகவும் பணியாளர்கள் பாதிக்கப்படுவதும் அதிகரித்து வருகிறது.

வீடுகளில் மட்டுமல்லாமல், பணியிடங்களிலும் நெருப்பு பாதிப்பை ஏற்படுத்தக்கூடியது. நெருப்பு என்பது தண்ணீரால் அணைக்கப்படுவது என்று தப்புக் கணக்கு வைத்திருக்கிறோம். எல்லா வகை நெருப்பும் தண்ணீருக்குக் கட்டுப்படாது. நெருப்பு முக்கோணத்தில் - எரிபொருள் - எரிக்கும் ஆக்சிஜன் - வெப்பம் ஆகிய மூன்றில் ஏதேனும் ஒன்றை அகற்றி விட்டால் நெருப்பு பரவாது. எரிபொருளைத் தனிமைப்படுத்துவதற்கு அதன் மீது மண்ணை அள்ளிப் போடலாம். கனத்த போர்வையால் மூடலாம்.

அதிலும் தீபாவளி பட்டாசுத் தொழிற்கூடங்களில் உலோகத் தூள் எரிந்தால், சில சமயங்களில் தண்ணீரும், மண்ணும் கைகொடுக்காது. மஞ்சள் நிறப் பொறியை ஏற்படுத்தும் சோடியம், தண்ணீரில் சோடாக்காரத்தை உருவாக்கி பற்றி எரியும். வெள்ளைப் புகை தரும் அலுமினிய, மக்னீசிய நெருப்புகளும் நீரில் அணை யாது. இந்திய விண்வெளித்துறையில் இதற்கான மூன்று குளோரைடு கலவை யான விசேடத் தீயணைப்புத் தூள் கண்டுபிடிக்கப்பட்டுள்ளது.

காற்றில் எரியும் எரிபொருள்களைச் சுற்றிலும் கனத்த கரியமில வாயுவைப் பீய்ச்சி, எரிக்கும் ஆக்சிஜனை நீர்த்துபோகச் செய்யலாம். இந்தத் திட, திரவ, வளிம, உலோக நெருப்புகளைத் தாண்டி ஐந்தாவதாக மின்சாரப் பொறியை அணைக்கவும் தனி யொரு தீயணைப்பு நுட்பம் தேவை. இன்றைய நவீனத் தொழிற்துறைகளின் வளர்ச்சி யால் நெருப்பு முக்கோணத்தின் நான்காவதான புது அங்கம் இது.