கனடா, மெக்ஸிகோவுக்கு கூடுதல் வரி: தற்காலிகமாக நிறுத்திவைத்தார் டிரம்ப்

கனடா, மெக்ஸிகோ ஆகிய நாடுகளின் சில பொருள்களுக்கு அறிவித்திருந்த கூடுதல் இறக்குமதி வரிவிதிப்பை அமெரிக்க அதிபர் டொனால்ட் டிரம்ப் நிறுத்திவைத்துள்ளார்.

- 

வாஷிங்டன், மார்ச் 7:

அந்த நாடுகளில் இருந்து இறக்குமதியாகும் பல்வேறு பொருள்களுக்கு கூடுதலாக 25 சதவீதமும் சீன பொருள்களுக்கு கூடுதலாக 20 சதவீதமும் அவர் ஏற்கெனவே வரி விதித்து பிறப்பித்த உத்தரவு செவ்வாய்க்கிழமை அமலுக்கு வந்தது.

இந்த நிலையில், ஏற்கெனவே அமலில் இருக்கும் அமெரிக்கா-மெக்ஸிகோ-கனடா தடையற்ற வர்த்தக ஒப்பந்தத்தில் (யுஎஸ்எம்சிஏ) இடம் பெற்றுள்ள பொருள்களுக்கு கூடுதல் வரி விதிப்பில் இருந்து விலக்கு அளிப்பதற்கான உத்தரவில் டிரம்ப் தற்போது கையொப்பமிட்டுள்ளார்.

அதற்கு முன்னதாக வாஷிங்டனில் உள்ள ஓவல் அலுவலகத்தில் செய்தியாளர்களிடம் டிரம்ப் கூறியதாவது: கனடா, மெக்ஸிகோ நாடுகளின் குறிப்பிட்ட பொருள்கள் மீது விதிக்கப்பட்டிருந்த கூடுதல் வரி வரும் ஏப்ரல் 2-ஆம் தேதி வரை நிறுத்திவைக்கப்படுகிறது.

அந்த தேதியில் பிற நாடுகள் அமெரிக்க பொருள்களுக்கு எவ்வளவு வரி விதிக்கின்றனவோ, அந்த நாடுகளின் பொருள்களுக்கு அதேவிகிதங்களில் வரி விதிக்கப்படும். அதுவரை, கனடா, மெக்ஸிகோவின் சில பொருள்களுக்கு மட்டும் கூடுதல் வரிவிதிப்பில் இருந்து விலக்கு அளிக்கப்படுகிறது.