பயங்கரவாதத்தின் எஜமான் பாகிஸ்தான்: அபிஷேக் பானர்ஜி

'பயங்கரவாதம் என்பது ஒரு வெறிபிடித்த நாய் என்றால் அதன் எஜமானாக பாகிஸ்தான் இருக்கிறது. அதைச் சமாளிக்க உலகம் ஒன்றிணைய வேண்டும்' என்று திரிணமூல் காங்கிரஸ் எம்.பி. அபிஷேக் பானர்ஜி தெரிவித்தார்.

- 

டோக்கியோ, மே 24:

'ஆபரேஷன் சிந்தூர்' நடவடிக்கை குறித்தும் எல்லை தாண்டிய பயங்கரவாதத்துக்கு பாகிஸ்தான் ஆதரவு அளிப்பது குறித்தும் ஜப்பான் உள்ளிட்ட நாடுகளுக்கு ஐக்கிய ஜனதா தள எம்.பி. சஞ்சய் ஜா தலைமையிலான குழு சுற்றுப்பயணம் மேற்கொண்டுள்ளது. இக்குழுவில் இடம்பெற்றுள்ள திரிணமூல் காங்கிரஸ் எம்.பி. அபிஷேக் பானர்ஜி, ஜப்பான் தலைநகர் டோக்கியோவில் சனிக்கிழமை நடைபெற்ற வெளிநாடுவாழ் இந்தியர்களுடனான சந்திப்பு ஒன்றில் பேசியதாவது:

இந்தியா அடிபணிய மறுக்கிறது என்ற உண்மையை எடுத்துக்கூறவே நாங்கள் இங்கு வந்துள்ளோம். நாங்கள் அச்சத்துக்கு அடிபணிய மாட்டோம். அவர்கள் (பயங்கரவாதிகள்) புரிந்து கொள்ளக்கூடிய மொழியில் பதிலடி கொடுப்பதற்கு நாங்கள் கற்றுக்கொண்டுவிட்டோம்.