திருச்செந்தூர் கடலில் விநாயகர் சிலைகள் விசர்ஜனம்

திருச்செந்தூர் கடலில் இந்து மக்கள் கட்சி சார்பில் விநாயகர் சிலைகள் விசர்ஜனம் செய்யப்பட்டது.

- 

தூத்துக்குடி/திருச்செந்தூர்/உடன்குடி/சாத்தான்குளம்/ஆறுமுகனேரி/கோவில்பட்டி, ஆக. 29:

விநாயகர் சதுர்த்தியை முன்னிட்டு தூத்துக்குடி தெற்கு மாவட்ட இந்து மக்கள் கட்சி சார்பில் காயாமொழி, அதன் சுற்றுவட்டாரக் கிராமங்களான வள்ளுவர் நகர், தேரிகுடியிருப்பு, கந்தசாமிபுரம், குமாரசாமிபுரம் உள்ளிட்ட பகுதிகளில் விநாயகர் சிலைகள் பூஜைக்கு வைக்கப்பட்டு சிறப்பு வழிபாடு நடைபெற்றது.

பூஜை செய்யப்பட்ட 9 விநாயகர் சிலைகள் வியாழக்கிழமை காயாமொழி முப்புடாதி அம்மன் கோயில் வளாகத்திலிருந்து ஊர்வலமாக புறப்பட்டு தளவாய்புரம் வழியாக திருச்செந்தூர் அய்யா வைகுண்டர் அவதார பதி கடற்கரைக்கு கொண்டு செல்லப்பட்டது. அங்கு விநாயகர் சிலைகள் சிறப்பு பூஜைக்கு பின் கடலில் விசர்ஜனம் செய்யப்பட்டன.

நிகழ்ச்சியில், மாநில பொதுச் செயலர் ரவிகிருஷ்ணன், மாநில செயலர் குமரி கனகராஜ், தமிழக நாடார் மக்கள் பேரவை மாவட்டத் தலைவர் சுந்தர், இந்து மக்கள் கட்சி மாவட்டச் செயலர் ராஜேஷ், மாவட்ட அமைப்பாளர் அரிகிருஷ்ணன், ஒன்றிய தலைவர் கோசல்ராமன், அன்னையர் சேனா மாவட்டத் தலைவி சித்ரா, அனுமன் சேனா மாவட்டத் தலைவர் தங்கராஜா, செல்வகுமார் உள்ளிட்டோர் கலந்துகொண்டனர்.

தூத்துக்குடி மாநகர பழைய இரும்பு வியாபாரிகள் சங்கம் சார்பில் பிரதிஷ்டை செய்யப்பட்ட விநாயகர் சிலை, வடபாகம் காவல் நிலையம் பின்புறமுள்ள கடற்கரையில் வெள்ளிக்கிழமை விசர்ஜனம் செய்யப்பட்டது.