கேரளத்தில் தொடரும் பாரத மாதா சர்ச்சை

கேரளத்தில் பாரத மாதா படத்தைப் பயன்படுத்துவது தொடர்பான சர்ச்சை நீடித்து வருகிறது.

- 

கோட்டயம், ஜூன் 10:

கேரள மாநிலத் தலைநகர் திருவனந்தபுரத்தில் உள்ள ஆளுநர் மாளிகையில் அண்மையில் உலக சுற்றுச்சூழல் தின விழா கொண்டாடப்பட்டது.

இவ்விழாவில் பாரத மாதா படத்துக்கு ஆளுநர் ராஜேந்திர விஸ்வநாத் ஆர்லேகர் மலர்தூவி மரியாதை செலுத்தினார்.

இதற்கு எதிர்ப்பு தெரிவித்து இவ்விழாவை கேரள வேளாண் துறை அமைச்சரும் இந்திய கம்யூனிஸ்ட் கட்சிப் பிரமுகருமான பி.பிரசாத் புறக்கணித்தார்.

இது தொடர்பாக அவர் கூறுகையில் 'அரசியல் சாசனத்தின்படியோ மத்திய அரசின் அதிகாரபூர்வ உத்தரவின்படியோ பாரத மாதா படத்துக்கு அங்கீகரிக்கப்பட்ட வடிவம் ஏதுமில்லை. சம்பந்தப்பட்ட விழாவில் வைக்கப்பட்டிருந்த பாரதமாதா படம் ஆர்எஸ்எஸ் அமைப்பு பயன்படுத்துவதாகும்' என்று தெரிவித்திருந்தார். இந்த விவகாரம் கேரள மாநில அரசியலில் சர்ச்சையை ஏற்படுத்தியது.