ஈரான் - அமெரிக்கா அமைதி ஒப்பந்தம் இறுதி

ஜூன் 19-இல் கையொப்பம்: டிரம்ப் அறிவிப்பு

- 

ஈரான் - அமெரிக்கா இடையேயான போரை முடிவுக்குக் கொண்டுவருவதற்கான அமைதி ஒப்பந்தம் இறுதி செய்யப்பட்டுள்ளது.

அமைதி ஒப்பந்தத்தில் இரு நாடுகளும் வரும் வெள்ளிக்கிழமை (ஜூன் 19) கையொப்பமிட உள்ளன.

இதுகுறித்து அறிவிப்பை தனது ட்ரூத் சோஷியல் பக்கத்தில் அமெரிக்க அதிபர் டொனால்ட் டிரம்ப் திங்கள்கிழமை பதிவிட்டார். டிரம்ப் 80 வயதை எட்டிய தினத்தில் இந்த ஒப்பந்தம் இறுதி செய்யப்பட்டிருப்பது குறிப்பிடத்தக்கது.

இதன்மூலம் ஈரான் மீது அமெரிக்க - இஸ்ரேல் கூட்டுப் படைகள் கடந்த 107 நாள்களாக நடத்திவந்த போர் முழுமையாக முடிவுக்கு வர உள்ளது. ஹோர்முஸ் நீரிணை திறக்கப்பட உள்ளதால், உலகளாவிய கச்சா எண்ணெய் விநியோகத்தில் ஏற்பட்ட பாதிப்பும் நீங்க உள்ளது.

டிரம்ப் தனது சமூக ஊடகப் பக்கத்தில் வெளியிட்ட பதிவில் கூறியிருப்பதாவது: ஈரான் உடனான அமைதி ஒப்பந்தம் இறுதி செய்யப்பட்டுள்ளது. அனைவருக்கும் வாழ்த்துகள். இந்த ஒப்பந்தம் மூலம் ஹோர்முஸ் நீரிணை திறக்கப்படும் என்பதோடு, ஈரான் துறைமுகங்களில் அமெரிக்க கடற்படைகளின் முற்றுகையும் முடிவுக்கு வரும். இதன்மூலம், உலக நாடுகளின் கப்பல்கள் ஹோர்முஸ் நீரிணையில் இனி தடையின்றி செல்ல முடியும் என்பதோடு, கச்சா எண்ணெய் விநியோகமும் தடையின்றி நடைபெறும்.

அமைதி ஒப்பந்தம் வரும் வெள்ளிக்கிழமை (ஜூன் 19) கையொப்பமான பிறகு, ஹோர்முஸ் நீரிணை திறக்கப்படும்.