தமிழகத்தில் அனைத்துத் துறை திறன் தொழிலாளர்கள்

தமிழகத்தில் விதவிதமான தொழிற்சாலைகள் அமைந்தாலும், அனைத்துத் துறைகளுக்கு ஏற்ப திறன் கொண்ட தொழிலாளர்கள் மாநிலத்தில் உள்ளதாக முதல்வர் ஸ்டாலின் பெருமிதத்துடன் தெரிவித்தார்.

- 

தூத்துக்குடி, ஆக. 4: இதைக் கருத்தில் கொண்டு தமிழகத்தில் முதலீடு செய்ய முன்வர வேண்டும் என்று முதலீட்டாளர்களுக்கு அவர் அழைப்பு விடுத்தார்.

தூத்துக்குடியில் திங்கள்கிழமை நடைபெற்ற முதலீட்டாளர்கள் மாநாட்டில் முதல்வர் மு.க.ஸ்டாலின் பேசியதாவது:

2024-ஆம் ஆண்டு சென்னையில் நடந்த உலக முதலீட்டாளர்கள் மாநாட்டில், கையொப்பமான புரிந்துணர்வு ஒப்பந்தங்களை செயல்படுத்த தமிழக அரசு கடுமையாக உழைத்து வருகிறது.

துறைமுகமும், இயற்கை வளமும் திறமையான மனிதவளமும் நிறைந்த தூத்துக்குடியை தொழில் வளர்ச்சி மிக்க மாவட்டமாக்கி கொண்டிருக்கிறோம். நீர்த் தேவையை நிறைவு செய்ய, கடல்நீரைக் குடிநீராக்கும் ஆலை அமைக்கப்பட்டு வருகிறது.

தூத்துக்குடி மாவட்டத்தில் நியோடைடல் பார்க் தொடங்கப்பட்டிருக்கிறது. திருநெல்வேலி மாவட்டத்தில், டாடா எரிசக்தி மற்றும் விக்ரம் சோலார் எரிசக்தி அகிய திட்டங்கள் மேற்கொள்ளப்பட்டு வருகின்றன. தென் தமிழகம் குறித்து தலைவர் கருணாநிதி கண்ட கனவு இன்றைக்கு நிறைவேறிக்கொண்டு இருக்கிறது.