நீலகிரியில் அழியும் நிலையில் உள்ள மருத்துவ குணம் கொண்ட பழங்கள்

நீலகிரியில் உள்ள தட்பவெப்ப நிலையில், ரசாயன உரங்கள் இல்லாமல் அதிகம் விளையும் மருத்துவ குணமிக்க விக்கி பழம், தவிட்டுப் பழம், குரங்கு பழம், நகாப் பழங்கள் தற்போது அழிவின் விளிம்பில் உள்ளதால், இவற்றின் நாற்றுக்களை அரசு தோட்டக்கலைப் பண்ணையில் உற்பத்தி செய்து, தேயிலை, காபி தோட்டங்களில் ஊடுபயிராக விளைவிப்பதன் மூலம் அழிவு நிலையில் இருந்து காப்பாற்ற முடியும் என்று பழ உற்பத்தியாளர்கள் கூறுகின்றனர்.

- 

உதகை, ஜூலை 20:

மலைகளின் அரசி என அழைக்கப்படும் நீலகிரி மாவட்டத்தில் உள்ள தட்பவெப்ப நிலையில் விளையும் மருத்துவ குணமிக்க, விக்கி பழம், தவிட்டுப் பழம், குரங்கு பழம், நகாப் பழங்கள் கடந்த 15 ஆண்டுகளுக்கு முன்பு வரை தமிழ்நாடு மட்டுமல்லாது கர்நாடகம், கேரளம், தில்லி, மும்பை போன்ற பகுதிகள் வரை விற்பனை செய்யப்பட்டன. ரசாயன உரங்கள் இன்றி இயற்கையாக வனப் பகுதிகளிலும், தனியார் தோட்டங்களிலும் வளர்க்கப்பட்ட இந்தப் பழங்கள் வயிற்று உபாதை, ரத்தத்தில் சர்க்கரை அளவைக் கட்டுப்படுத்துதல், உடல் குளிர்ச்சி போன்ற மருத்துவ குணங்கள் கொண்டதாகும், மிகவும் சுவையும் நிறைந்து காணப்படுவதால் ஒரு காலத்தில் இந்தப் பழங்களை உள்ளூர் மற்றும் சுற்றுலாப் பயணிகள் அதிக அளவு வாங்கி சுவைத்து பயனடைந்தனர்.