எஸ்.ஜே.ஆர்: விளக்கங்களும், குழப்பங்களும்!

தமிழ்நாட்டில் வாக்காளர் பட்டியல் சிறப்பு தீவிர திருத்தப் பணிக்காக (எஸ்.ஐ.ஆர்) வழங்கப்படும் கணக்கீட்டுப் படிவத்தைப் பூர்த்தி செய்வதில் வாக்காளர்கள் பிரச்னைகளை எதிர்கொள்வதாகப் புகார் எழுந்துள்ளது. இந்த விஷயத்தில் பல அம்சங்கள் தொடர்பாக தெளிவற்ற நிலை தொடர்வதாக அவர்கள் தெரிவிக்கின்றனர்.

- பீ. ஜெபலின் ஜான்

பிகாரில் மேற்கொள்ளப்பட்ட எஸ்.ஐ.ஆரில் லட்சக்கணக்கான வாக்காளர்கள் நீக்கப்பட்டதையடுத்து, எஸ்.ஐ.ஆர் நடவடிக்கைக்கு நாடு முழுவதும் எதிர்க்கட்சிகள் மத்தியில் கடும் எதிர்ப்பு தெரிவிக்கப்பட்டு வருகிறது. இந்த நிலையில், தமிழகத்தில் எஸ்.ஐ.ஆர் பணிகள் கடந்த நவ.4-ஆம் தேதி தொடங்கியுள்ளது.

கடைசியாக, 2025, ஜன.1-இல் வெளியிடப்பட்ட வாக்காளர் பட்டியலின்படி தமிழகத்தில் 6.36 கோடி வாக்காளர்கள் உள்ளனர். இவர்கள் அனைவருக்கும் சிறப்பு தீவிர திருத்தம் மேற்கொள்வதற்கான படிவங்கள் வழங்கப்பட்டு வருகின்றன. தமிழகம் முழுவதும் 68,467 வாக்குச் சாவடி நிலை அலுவலர்கள் இப்பணியில் ஈடுபட்டு வருகின்றனர்.

நடைமுறைச் சிக்கல்கள்:

கணக்கீட்டுப் படிவங்களைப் பூர்த்தி செய்து கொடுப்பதில், வாக்காளர்கள் பல்வேறு நடைமுறைச் சிக்கல்களை எதிர்கொள்கின்றனர். இந்தப் படிவத்தில் மூன்று பிரிவுகளில் தகவல்கள் கேட்கப்படுகின்றன.

முதல் பிரிவில், சம்பந்தப்பட்ட வாக்காளர்களின் தகவல்கள் கேட்கப்பட்டிருக்கும். அதாவது, பிறந்த தேதி, ஆதார் எண், கைப்பேசி எண், பெற்றோர் பெயர்கள், கணவர் அல்லது மனைவியின் பெயர் போன்றவற்றை அளிக்க வேண்டும்.

இரண்டாவது பிரிவில், முந்தைய சிறப்பு தீவிர திருத்தத்தின் போது (2002 - 2005) இடம்பெற்றிருந்த தகவல்களை அளிக்க வேண்டும். வாக்காளரின் பெயர், முந்தைய அடையாள எண், உறவினரின் பெயர், மாவட்டம், தொகுதி போன்ற விவரங்களை அளிக்க வேண்டும்.

மூன்றாவது பிரிவில், உறவினர்களைப் பற்றிய விவரங்கள் கேட்கப்பட்டிருக்கும். அதாவது, இரண்டாவது பிரிவில் எந்த உறவினரின் பெயர் அளிக்கப்பட்டதோ அவர்களைப் பற்றிய விவரங்களை இங்கே எழுத வேண்டும்.