நாகாலாந்து ஆளுநர் இல.கணேசன் மறைவு

நாகாலாந்து ஆளுநரும், பாஜகவின் இலக்கிய முகமாகத் திகழ்ந்தவருமான இல.கணேசன் (80) உடல்நலக்குறைவால் வெள்ளிக்கிழமை காலமானார்.

- 

சென்னை, ஆக.15:

தஞ்சாவூரில் 16.2.1945-இல் இலக்குமி ராகவன்- அலமேலு தம்பதியின் ஒன்பது குழந்தைகளில் ஏழாவது மகனாகப் பிறந்தவர் இல.கணேசன். தந்தை பலசரக்குக் கடைக்காரர், பத்திரிகை முகவராகவும் இருந்தவர்.

சிறுவயதிலேயே தந்தையை இழந்துவிட்டதால், சகோதரர்களின் அரவணைப்பில் இல.கணேசன் வளர்ந்தார். தஞ்சையில் தெற்கு வீதியில் உள்ள வீரராகவ மேல்நிலைப் பள்ளியில் பயின்றார். பின்னர், மாவட்ட ஆட்சியரகத்தில் இருந்த நகர நில வரித் திட்ட அலுவலகத்தில் பணியாற்றினார். இவரது அண்ணன்கள் மூவர் ஆர்எஸ்எஸ் ஈடுபாட்டுடன் வளர்ந்தவர்கள்.

இதனால் ஐந்து வயதிலேயே இல.கணேசன், ஆர்எஸ்எஸ் ஷாகா பயிற்சிகளில் பங்கேற்கத் தொடங்கினார். இளம் வயதில் ஆர்.எஸ்.எஸ். இயக்கத்தில் இணைந்த இல.கணேசன் திருமணம் செய்து கொள்ளாமல், முழுநேரமும் மக்கள் பணியாற்றினார்.