டீசல் ஏற்றிச் சென்ற ரயில் தடம் புரண்டு தீப்பிடித்தது

18 டேங்கர்கள் சேதம்

- 

திருவள்ளூர்/சென்னை, ஜூலை 13: திருவள்ளூர் அருகே டீசல் ஏற்றி வந்த சரக்கு ரயில் ஞாயிற்றுக்கிழமை அதிகாலை தடம்புரண்டு தீப்பற்றியது. இதில், 18 டேங்கர்களில் இருந்த டீசல் முற்றிலும் எரிந்தது. இதனால், அந்தப் பகுதியில் பெரும் புகை மண்டலம் சூழ்ந்தது.

பல்வேறு பகுதிகளில் இருந்து வந்த 50-க்கும் மேற்பட்ட தீயணைப்பு வாகனங்கள் மூலம் 10 மணி நேரம் போராடி தீயை அணைத்து கட்டுப்பாட்டுக்குள் கொண்டு வந்தனர். விபத்து தொடர்பாக மூன்று பேர் கொண்ட உயர்நிலைக் குழு அமைக்கப்பட்டு விசாரிக்கப்படுவதாக தெற்கு ரயில்வே தெரிவித்துள்ளது.

சென்னை எண்ணூர் துறைமுகத்திலிருந்து இந்தியன் ஆயில் கார்ப்பரேஷனுக்கான (ஐஓசி) உயர் ரக டீசல் சரக்கு ரயிலில் ஏற்றப்பட்டு வாலாஜா பகுதிக்கு ஞாயிற்றுக்கிழமை அதிகாலை எடுத்துச்செல்லப்பட்டது. ரயிலில் இருந்த 50 டேங்கர்களில் 2 டேங்கர்களை தவிர்த்து, 48 டேங்கர்களில் (வேகன்களில்) தலா 70 ஆயிரம் லிட்டருக்கும் அதிகமான உயர் ரக டீசல் என மொத்தம் 35 லட்சம் லிட்டர் டீசல் எடுத்துச் செல்லப்பட்டதாகக் கூறப்படுகிறது.