கொல்லிமலை மலைப்பாதையில் ஆபத்தான ‘ஸ்கேட்போர்டிங்’

கொல்லிமலைக்கு செல்லும் மலைப்பாதை வளைவுகளில், வெளிமாநிலத்தினர் சிலர் ஆபத்தான முறையில் ‘ஸ்கேட்போர்டிங்’ பயிற்சி செய்வதால் வாகன ஓட்டிகள் அச்சமடைந்துள்ளனர்.

- 

நாமக்கல், ஜூலை 14:

விபத்துகள் நிகழும் முன்பு இத்தகைய பயிற்சிகளுக்கு காவல் துறை தடை விதிக்க வேண்டும் என்ற கோரிக்கை எழுந்துள்ளது.

தமிழகத்தில் உள்ள முக்கிய சுற்றுலாத் தலங்களில் ஒன்றாக நாமக்கல் மாவட்டம், கொல்லிமலை உள்ளது. கோடைகாலத்திலும், விடுமுறை நாட்களிலும் சுற்றுலாப் பயணிகள் வருகை அதிகரித்து காணப்படும். குறிப்பாக, சனி, ஞாயிற்றுக்கிழமைகளில், பெங்களூரில் உள்ள தகவல் தொழில்நுட்ப நிறுவனங்களில் பணியாற்றும் கேரளம், கர்நாடகத்தைச் சேர்ந்த இளைஞர்கள், இளம்பெண்கள் நவீன இருசக்கர வாகனங்களில், கொல்லிமலை மலைப்பாதையில் சாகசம் என்ற பெயரில் அதிவேகமாக செல்வதை காணமுடியும்.

அதுமட்டுமின்றி, பெரிய அளவிலான இருசக்கர, நான்கு சக்கர வாகனத் தயாரிப்பு நிறுவனங்கள் தங்களுடைய புதிய வாகனங்களின் திறனை பரிசோதிக்க கொல்லிமலை மலைப்பாதையையே அதிகம் பயன்படுத்தி வருகின்றனர்.