என்ஐஏ பிடியில் பயங்கரவாதி ராணா

2008 மும்பை பயங்கரவாத தாக்குதல் வழக்கில் தேடப்பட்டவர்

- 

புது தில்லி, ஏப்.10: மும்பை பயங்கரவாத தாக்குதல் சம்பவத்தின் முக்கிய நபராக கருதப்படும் பயங்கரவாதி தஹாவூர் ராணா (64) அமெரிக்காவில் இருந்து இந்தியாவுக்கு வியாழக்கிழமை நாடுகடத்தப்பட்டார். தில்லி விமானநிலையத்தில் வைத்து அவரை தேசிய புலனாய்வு முகமை (என்ஐஏ) கைது செய்தது. கடந்த 2008-ஆம் ஆண்டு, நவம்பரில் மகாராஷ்டிர மாநிலம் மும்பையில் நிகழ்த்தப்பட்ட பயங்கரவாத தாக்குதல் சம்பவத்தில் 166 பேர் உயிரிழந்தனர். 238 பேர் படுகாயமடைந்தனர். கடல் வழியாக மும்பைக்குள் நுழைந்த பயங்கரவாதிகள் இந்த தாக்குதலை நடத்தினர்.

இதில் மூளையாகச் செயல்பட்டவர்களில் ஒருவரான பாகிஸ்தான்-அமெரிக்க பயங்கரவாதி டேவிட் ஹெட்லியின் நெருங்கிய நண்பர் தஹாவூர் ராணா.

கனடா குடியுரிமை பெற்ற பாகிஸ்தான் வம்சாவளி நபரான ராணாவுக்கு லஷ்கர்-ஏ-தொய்பா மற்றும் ஹர்கத்-அல்-ஜிஹாதி இஸ்லாமி உள்பட பாகிஸ்தானைச் சேர்ந்த பல்வேறு பயங்கரவாத அமைப்புகளுடன் தொடர்புள்ளது.

ராணாவின் குடியேற்ற ஆலோசனை சேவைகள் நிறுவனத்தின் மூலம்தான், மும்பை தாக்குதல் சம்பவத்துக்கு உளவு - திட்டமிடல் நடவடிக்கைகளில் ஹெட்லி ஈடுபட்டார்.