பழனி உள்ளிட்ட 48 கோயில்களின் முழுமையான தணிக்கை விவரங்களைத் தாக்கல் செய்ய உத்தரவு

தமிழகத்தில் அதிக வருவாய் உள்ள பழனி உள்ளிட்ட 48 கோயில்களின் முழுமையான தணிக்கை விவரங்களை பிடிஎஃப் வடிவில் இணையதளத்தில் வெளியிட வேண்டும் என இந்து சமய அறநிலையத் துறைக்கு சென்னை உயர்நீதிமன்றம் உத்தரவிட்டது.

- 

சென்னை மயிலாப்பூரைச் சேர்ந்த டி.ஆர். ரமேஷ் என்பவர் உயர்நீதிமன்றத்தில் தாக்கல் செய்த பொதுநல மனுவில், அறநிலையத் துறைக் கட்டுப்பாட்டில் உள்ள கோயில்களில் ரூ.1,000-க்கு மேல் வருமானம் இருந்தால், அந்தக் கோயிலின் வரவு - செலவு கணக்கை பொது மக்கள் பார்வையிடும் வகையில் ஆண்டுதோறும் வெளியிட வேண்டும் என்பது இந்து சமய அறநிலையத் துறை சட்ட விதி. ஆனால், கடந்த 40 ஆண்டுகளுக்கு மேல் கோயில்களின் வரவு- செலவு கணக்கு வெளியிடப்படவில்லை.

பக்தர்கள், கொடையாளர்கள் அக்கோயிலின் வரவு -செலவுகளைத் தெரிந்துகொள்ள உரிமை உள்ளது. பொதுத் துறை நிறுவனங்கள், கார்ப்பரேட் நிறுவனங்கள் வரவு -செலவு கணக்குகளை தமது இணையதளத்தில் வெளியிடுவதுபோல, கோயில்களின் வரவு - செலவு கணக்குகளை அறநிலையத் துறை இணையதளத்தில் வெளியிட உத்தரவிட வேண்டும் எனக் கூறியிருந்தார்.