பருத்திக்கு இறக்குமதி வரி விலக்கு: மத்திய, மாநில அரசுகளுக்கு சைமா நன்றி

பருத்தி பஞ்சு மீதான 11 சதவீத இறக்குமதி வரி ரத்து செய்யப்பட்டிருப்பதற்கு தென்னிந்திய பஞ்சாலைகள் சங்கம் (சைமா) மத்திய, மாநில அரசுகளுக்கு நன்றி தெரிவித்துள்ளது.

- 

கோவை, ஆக. 19:

பருத்தி பஞ்சு மீதான 11 சதவீத இறக்குமதி வரி, இந்திய ஜவுளித் துறைக்கு பெரும் சுமையாக இருந்தது. மூலப்பொருள் பற்றாக்குறையை சமாளிப்பதற்காக கடந்த 2002 ஏப்ரல் முதல் செப்டம்பர் வரை அனைத்து வகையான பருத்திக்கும் மத்திய அரசு இறக்குமதி வரி விலக்கு அளித்தது. இதையடுத்து, இந்த வரி விலக்கு அக்டோபர் வரை நீட்டிக்கப்பட்டது.

இந்த சலுகை கரோனாவுக்கு பிந்தைய ஆண்டில் கிடைத்த அபரிமிதமான தேவையைப் பூர்த்தி செய்து, 45 பில்லியன் டாலர் ஏற்றுமதி உள்ளிட்ட ஒட்டுமொத்த தொழில் துறையும் 172 பில்லியன் டாலர் என்ற வர்த்தக அளவை எட்டுவதற்கு உதவி செய்தது.

இறக்குமதி வரி விதிப்பதற்கு முன்பு நாட்டின் வருடாந்திர பருத்தி உற்பத்தி 3.50 கோடி பேல்களாகவும், உள்நாட்டுத் தேவை 3.35 கோடி பேல்களாகவும் இருந்த நிலையில், விவசாயிகளின் நலனைக் காக்கும் வகையில் பருத்தி மீது அரசு 11 சதவீத இறக்குமதி வரியை விதித்தது.