நாடாளுமன்ற நிகழ்வுகள் வேதனை அளிக்கின்றன

'தற்போதைய நாடாளுமன்ற நிகழ்வுகள் வேதனை அளிக்கின்றன; பேசலாம்; வெளிநடப்பு செய்யலாம்; ஜனநாயகத்தை சீர்குலைக்கும் வகையில் நடந்துகொள்ளக்கூடாது' என்று முன்னாள் குடியரசு துணைத் தலைவர் வெங்கையா நாயுடு குறிப்பிட்டார்.

- 

சென்னை, ஆக. 12:

சென்னை விஐடி மற்றும் நாவலர் நெடுஞ்செழியன்-இரா.செழியன் அறக்கட்டளை சார்பில் விருது வழங்கும் விழா சென்னை விஐடி வளாகத்தில் செவ்வாய்க்கிழமை நடைபெற்றது. இதில், ஜம்மு - காஷ்மீர் முன்னாள் ஆளுநரும், முன்னாள் மத்திய அமைச்சருமான டாக்டர் கரண் சிங்கிற்கு இரா.செழியன் விருதையும், உலகத் தமிழர் பேரமைப்பின் தலைவர் பழ.நெடுமாறனுக்கு டாக்டர் நாவலர் விருதையும் வழங்கி முன்னாள் குடியரசு துணைத் தலைவர் வெங்கையா நாயுடு பேசியதாவது:

பொது வாழ்க்கையில் உள்ளவர்களுக்கு விஐடி வேந்தர் கோ.விசுவநாதன் ஒரு முன்மாதிரி. சட்டப்பேரவை, நாடாளுமன்ற உறுப்பினராக இருந்து தற்போது கல்வி நிறுவனங்கள் மூலம் மாற்றத்தை அவர் ஏற்படுத்தியுள்ளார்; கல்வியில் தரநிலை நெறிமுறைகள் மதிப்புகளைப் பேணுபவர் கோ.விசுவநாதன்.

இன்றைய இளைஞர்கள் நேர்மையாகவும், ஆக்கபூர்வமாகவும் இருக்க வேண்டும். அதுதான் நாட்டின் வளர்ச்சிக்கு தேவை. சமுதாயத்தில் ஏழ்மை நிலையில் இருப்பவர்களுக்கும் உயர்தர கல்வி கிடைக்க வேண்டும்.