இங்கிலாந்து தொடரும்... இனிவரும் நட்சத்திரங்களும்...

விறுவிறுப்பாக நடைபெற்ற 'ஆண்டர்சன் - டெண்டுல் கர் கோப்பை' டெஸ்ட் கிரிக்கெட் தொடர், பரபரப்பாக நிறைவடைந்திருக்கிறது. இந்தியாவும், இங்கிலாந்தும் தலா 2 வெற்றிகளைப் பகிர்ந்துகொள்ள, ஒரு ஆட்டம் சமன் ஆனதால், தொடரும் சமனில் முடிவடைந்தது.

- -நாதன் நடராஜன்

இந்தத் தொடரை வெற்றியுடன் இங்கிலாந்து தொடங்க, அடுத்த ஆட்டத்திலேயே இந்தியா அபார வெற்றி கண்டு பதிலடி கொடுத்தது. விட்டுக்கொடுக்காத இங்கிலாந்து 3-ஆவது ஆட்டத்தில் வெல்ல, போராடிய இந்தியா 4-ஆவது ஆட்டத்தில் டிரா செய்தது. இதனால் இங்கிலாந்து 2-1 என்ற முன்னிலையுடன் வசதியாக கடைசி ஆட்டத்துக்கு வந்தது.

தொடர் கைநழுவிச் சென்று விட்டபோதும், வெற்றிக் கோப்பையை இங்கிலாந்துக்கு விட்டுக் கொடுக்க தயாராக இல்லாத இந்தியா, விடாப்பிடியாக விளையாடி கடைசி ஆட்டத்தில் வென்றிருக்கிறது. தொடரையும் சமன் செய்திருக்கிறது.

தி ஓவல் டெஸ்ட் முடிவை மட்டும் பார்த்தவர்களுக்கு இந்தியா தொடரையே வென்றுவிட்டதைப் போன்ற சூழல் தென்படலாம். ஆனால் இந்தச் சமன், சாதாரணமானது அல்ல.

வழக்கமான கேப்டன் ரோஹித் சர்மா, நட்சத்திர வீரர் விராட் கோலி, நம்பகமான பௌலர் ரவிச்சந்திரன் அஸ்வின் போன்ற அனுபவசாலிகள் இல்லாத நிலையில், பிரதான பௌலரான ஜஸ்பிரீத் பும்ரா பகுதியளவே பங்களித்த சூழலில் இளம் வீரர்களுடன் புதிய கேப்டன் தலைமையில் இந்தியா இந்தத் தொடரை எதிர்கொண்டது குறிப்பிடத்தக்கது.

இங்கிலாந்தில் தரையிறங்கிய போது, ஷுப்மன் கில் தலைமையிலான இந்திய அணி மீது அவ்வளவாக எதிர்பார்ப்புகள் இல்லை. ஆனால் சுமார் ஒன்றரை மாதங்கள் நடைபெற்ற இந்த 5 டெஸ்ட்டுகளின் முடிவில், அடுத்த தலைமுறை இந்திய அணி, தனது புதிய பயணத்துக்குத் தயாராகிவிட்டது தெளிவாகத் தெரிகிறது.

பயிற்சியாளர் பிரெண்டன் மெக்கல்லம் - கேப்டன் பென் ஸ்டோக்ஸ் கூட்டணியின் 'பாஸ்பால்' எனப்படும் அதிரடி ஆட்ட உத்தியுடன் களம் கண்ட இங்கிலாந்தை, அதன் சொந்த மண்ணில் எதிர்கொண்டு தொடரை சமன் செய்வது என்பது, அவ்வளவாக அனுபவம் இல்லாத வீரர்களுடன், புதிய தலைமையின் கீழ் விளையாடிய இந்தியாவுக்கு எளிதானதல்ல.