2024-25ல் 11.2% பொருளாதார வளர்ச்சியுடன் இந்திய அளவில் தமிழ்நாடு முதலிடம்

2024-25ல் 11.2 சதவீத பொருளாதார வளர்ச்சியுடன் இந்திய அளவில் தமிழ்நாடு முதலிடம் பிடித்துள்ளது.

- 

ஒன்றிய அரசின் புள்ளியியல் மற்றும் திட்ட அமலாக்கத்துறை அண்மையில் வெளியிட்டுள்ள 2024-25ம் ஆண்டுக்கான திருத்திய மதிப்பீட்டு அறிக்கையின் அடிப்படையிலான புள்ளி விவரங்களின் படி, இந்திய தேசிய சராசரியைவிடவும், மற்ற மாநிலங்களை விடவும் தமிழ்நாடு எந்தெந்த துறைகளில் கடந்த 4 ஆண்டுகளில் அபரிதமான வளர்ச்சி கண்டு பொருளாதார முன்னேற்றத்தில் ஒரு மகத்தான சாதனையை நிகழ்த்தியுள்ளது என்பதைப் புலப்படுத்துகிறது.

இந்தியாவின் இரண்டாவது பெரிய மாநிலப் பொருளாதாரமான தமிழ்நாடு, வளர்ச்சிப் பட்டியலில் முதலிடத்திற்கு முன்னேறியுள்ளது. புள்ளியியல் மற்றும் திட்ட அமலாக்க அமைச்சகத்தின் திருத்தப்பட்ட மதிப்பீடுகளின் படி, 2024-25ம் ஆண்டில் 11.2% உண்மையான பொருளாதார வளர்ச்சியைப் பதிவு செய்து, அனைத்து மாநிலங்களிலும் முதலிடத்தைப் பிடித்துள்ளது. இந்த இரட்டை இலக்க வளர்ச்சி, கடந்த 14 ஆண்டுகளில் மாநிலத்தின் சிறந்த வளர்ச்சியாகும். கடைசியாக 2010-11ல் 13.1% ஆக இது பதிவாகியிருந்தது. இது 6.5% என்ற தேசிய சராசரியை விட மிக அதிகமாகும்.

உற்பத்தித் துறையில் மிக உயர்ந்த வளர்ச்சி விகிதம்: இந்த அசாதாரண வளர்ச்சிக்கு முக்கிய காரணம் இரண்டாம் நிலைத் துறையாகிய உற்பத்தி, கட்டுமானம் மற்றும் பயன்பாட்டுத் துறைகள் ஆகும். உற்பத்தித் துறை 2023-24ல் 12.6% மற்றும் 2024-25ல் 14.7% என மிக உயர்ந்த வளர்ச்சி விகிதங்களைக் கண்டு, மாநிலத்தின் முக்கிய வளர்ச்சி இயந்திரமாகத் திகழ்கிறது.