Kaptein Maasdorp hou kolonel Gerber in donker oor alien

KOLONEL Gustav Gerber, speurhoof by die Kaapstad-polisiestasie, loop woedend in die lang gang af. Dit lyk asof hy op die oorlogspad is. Sy weglê-snor bewe soos hy stoom afblaas.

- 

Hy storm by speur-kaptein Alex Maasdorp se kantoor in. Maasdorp kyk verbaas van agter sy lessenaar op in die woedende gesig van sy baas.

"Kaptein Maasdorp, hoekom moet ek daar voor by die lede in die CSC hoor dat jy terug is? Wanneer het jy teruggekom?" gaan Gerber gal af.

Maasdorp, so koel en kalm soos gewoonlik, groet: "Goeiemôre, Kolonel. Dit gaan goed, dankie, en met u?" Elke woord van Maasdorp drup van die sarkasme.

Nou bewe Gerber se snor oortyd.

"Moenie nog kom snaaks wees nie, ek wag heeltyd vir jou terugvoering en –"

"Kolonel, hier in dié kantoor groet ons eers, dan praat ons," val hy sy baas kalm in die rede.

'En toe verdwyn jy sommer'

Gerber trippel eers ongemaklik rond, en gaan plak hom toe in die stoel oorkant Maasdorp neer.

"Sorry, man! Goeiemôre, Kaptein," groet hy vinnig. "Dis net dat jy my senuwees klaar het met die gedoente van daardie twee special agents van daai geheime staatsonder-soekeenheid ... 'm ... Kode 108 en Kode 101.

"Ek het jou opdrag gegee om hulle te assist met hulle geheime ondersoek na daardie vreemde alien-agtige ding wat nou so amok saai hier in die Wes-Kaap.

"En toe verdwyn jy sommer netso en laat hoor niks van jou nie!"

"Daardie so-called geheime agents is hardcore criminals," kap Maasdorp terug.

Kolonel Gerber snak na sy asem toe hy dit hoor. Hy staar Maasdorp grootoog aan. "W-Wat sê jy nou daar?" hyg hy dit uit.

Maasdorp besef dat hy nou besig is om sy bek verby te praat. Hy kan mos nie die volle waarheid aan sy baas vertel van hoe hy uiteindelik in die geselskap van Lucan Scali, die sogenaamde alien wat tussen dimensies beweeg, beland het nie.