கையால் கதிரவனை மறைக்கும் முயற்சி...

அறிவியலுக்கு புறம்பான மத நம்பிக்கைகள் அடிப்படையில் அரசியல் செய்து ஆட்சியையும் பிடித்துவிட்டவர்கள் இப்போது அறிவியல் அடிப்படையில் அமைந்த தொல்லியல் ஆய்வுக்கு ஆதாரம் கேட்கிறார் என்றால், இதைவிட வேடிக்கை இருக்க முடியுமா?

- 

அத்திரப்பாக்கம், அரிக்காமேடு, ஆதிச்சநல்லூர் என்று அகர வரிசை ஊர்களில் தொடங்கி அத்தனை ஊர்களிலும் அகழ, அகழ, ஆழமான அழுத்தமான தமிழ் தமிழர் தொடர்பான ஆதாரங்கள் அட்டி, அட்டியாக வந்து கொண்டேயிருக்க, மதுரை அருகே கீழடி வேறு தமிழர் வரலாற்றை தொல் பழங்காலத்துக்கு கொண்டு சென்றது. வேத நாகரிகமே முந்தையது, திராவிட தமிழ் நாகரீகம் பிந்தையது என்று வாய் ஜாலம் அடிக்கின்ற அடிப்படைவாதிகளால் இதனை பொறுத்துக் கொள்ள முடியவில்லை.

குறிப்பாக, திராவிடர்களான தொல் தமிழர்களே சூழ்ந்திருந்த இந்த இந்திய திருநாட்டை, ஆரியர்களின் சொந்த வீடாக மாற்ற திட்டவட்டமான செயல்பாடு கொண்டு இயங்கும் பார்ப்பனிய சக்தியாலும் பாஜக அரசாலும் இதை பொறுத்துக் கொள்ள முடியவில்லை.

கீழடியில் கண்டெடுக்கப்பட்ட கலைப்பொருட்கள், தமிழகத்தில் ஒரு நகர்ப்புற நாகரிகத்தின் இருப்பை சுட்டிக்காட்டுவதாக தெள்ளத் தெளிவாக தெரிய வந்த நிலையில், ஆய்வு முடிவுகளை அங்கீகரிக்க ஒன்றிய அரசு விரும்பவில்லை. ஆதாரத்துக்கே ஆதாரம் கேட்டு, இதுவரை ஆய்ந்தறிந்து உண்மைக்கு சேதாரத்தை விளைவிக்க முயல்கின்றனர். ஆம், கரிம சோதனை அடிப்படையில் அனைத்தையும் தெளிவு படுத்திய பின்பும், 'அறிவியல் முறைப்படி' அறிவிக்க வேண்டும் என்று வம்படியாக ஒன்றிய அமைச்சர் வாதிடுகிறார்.