தலைமை நீதிபதிக்கு அவமரியாதை சட்டத்துக்கும் மரபுக்கும் அவமதிப்பு..

பதவிக்குரிய மரியாதையோடு வாழும் ஆட்சியாளர்களால் ஆட்சிக்குரிய தகுதியோடு நாடு இயங்கும். நடப்பு பாஜக ஆட்சியில் ஒருபுறம் அதிகார அத்துமீறல் நடக்கிறது. மறுபுறம் அவமதிப்பு நிகழ்கிறது.

- 

மும்பை தாதரில் மகாராஷ்டிர - கோவா பார் கவுன்சில் ஏற்பாடு செய்திருந்த பாராட்டு விழாவில் கலந்துகொள்ள கடந்த ஞாயிறன்று சென்றிருந்தார் நாட்டின் 52-ஆவது உச்சநீதிமன்ற தலைமை நீதிபதி பி.ஆர். கவாய். அவரது சொந்த மண்ணில் அவருக்கு கிடைத்த முதல் மரியாதை அவமரியாதையாகவே இருந்ததுதான் அதிர்ச்சிக்குரிய உண்மை.

மரபார்ந்த நடைமுறைப் படி அவரை வரவேற்க வந்திருக்க வேண்டிய மகாராஷ்டிர தலைமைச் செயலர், மாநில காவல் துறைத் தலைவர், மும்பை காவல் ஆணையர் ஆகியோரில் ஒருவர் கூட வரவில்லை.

நிகழ்ச்சியில் இது குறித்து கவாய் தனது அதிருப்தியை வெளிப்படுத்தியுள்ளார். "ஜனநாயகத்தின் தூணான நீதித்துறைக்கு, மற்ற துறைகள் காட்டும் இதுபோன்ற மரியாதை கவலையளிக்கிறது. இங்கு நான் சொல்ல விரும்புவது ஒன்றுதான். நீதித்துறை, சட்டப்பேரவை, நிர்வாகம் ஆகிய மூன்றும் ஜனநாயகத்தின் மூன்று தூண்கள். இவை மூன்றும் இணைந்து செயல்பட வேண்டும். ஒவ்வொரு துறையும் மற்றொன்றுக்கு மரியாதை கொடுக்க வேண்டும். உயரதிகாரிகளுக்கு நெறிமுறைகள் இருக்கும். ஆனால், மாநில காவல் துறை தலைவர், மும்பை காவல் ஆணையர் வர விரும்பவில்லை என்றால் அதுபற்றி அவர்கள் தான் சிந்திக்க வேண்டும்.