இந்திய மாணவருக்கு அமெரிக்கா இழைத்த கொடுமை...

வல்லரசு என்ற கோதாவில் வளரும் நாடுகளில் அமெரிக்கா செய்யும் கட்டப்பஞ்சாயத்தும் சண்டித்தனமும் அதிகம். இறக்குமதி வரி விகிதத்தை விருப்பம் போல் ஏற்றி, இறக்கி நட்பு நாடுகளைக் கூட தர்ம சங்கடத்தில் நெளியவிட்டது. சீனாவிடம் அதற்காக மூக்குடைப்பட்டு நின்றது. சட்டவிரோத குடியேற்றத்தை தடுப்பதாக கூறி, பிற நாடுகளிலிருந்து வந்தவர்களை தீவிரவாதிகள் போல் நடத்தி நாடு கடத்தியது.

- 

அதன் தொடர்ச்சியாக உயர்கல்விக்காக அமெரிக்கா சென்ற இந்திய மாணவர், சட்டவிரோதமாக நுழைந்திருப்பதாக கூறி, குற்றவாளியை போல கைது செய்யப்பட்டிருக்கும் அதிர்ச்சி சம்பவம் அண்மையில் நிகழ்ந்துள்ளது. இந்த சம்பவத்திற்கு வருத்தம் தெரிவிப்பதற்கு பதில், அதிகார தொனியில் அமெரிக்கா பேசியிருப்பது, இந்தியர்களிடையே அதிருப்தியை ஏற்படுத்தியுள்ளது. கடந்த 6ஆம் தேதி பிரபல தொழிலதிபர் குணால் ஜெயின், தனது எக்ஸ் தளத்தில் காணொளி ஒன்றை பகிர்ந்திருந்தார். அதில், நியூ ஜெர்சியின் நெவார்க் விமான நிலையத்தில் இந்திய மாணவரை, அந்நாட்டு போலீசார் குற்றவாளியை போல கைது செய்ததாகவும், மாணவர் கண்ணீர் விட்டு அழுதும் கூட, இரக்கம்காட்டாமல், ஆயுதமேந்திய குற்றவாளியை கைது செய்வதை போல மாணவரை தாக்கியதாகவும் கூறியிருந்தார்.