கொக்கரித்த ட்ரம்ப்! சைலண்ட் மோடி!

இரண்டாவது முறையாக அமெரிக்க அதிபராகப் பொறுப்பேற்றுள்ள டொனால்ட் ட்ரம்ப், அமெரிக்காவில் சட்டவிரோதமாகக் குடியேறியுள்ள இந்தியர்களில், நூறு பேர்வரை ராணுவ விமானத்தில் காலில், கையில் சங்கிலி போட்டு பஞ்சாப் மாநிலம் அமிர்தசரஸுக்கு அனுப்பி வைத்தது, இந்தியா அங்கம் வகிக்கும் பிரிக்ஸ் அமைப்பு நாடுகளுக்கு 100% இறக்குமதி வரி விதிப்பேன் என்பதுமாக அடுத்தடுத்த அதிரடிகளைத் தொடர்ந்தார். இத்தனைக்குமிடையே பிரான்ஸ் மற்றும் அமெரிக்காவுக்கு மோடி சுற்றுப்பயணம் செய்தது பரபரப்பை ஏற்படுத்தியது.

- தெ.சு.கவுதமன்

அமெரிக்க பயணத்திற்கு முன்னதாக, கடந்த 11ஆம் தேதி, பிரான்ஸ் தலைநகர் பாரீஸில் நடைபெற்ற செயற்கை நுண்ணறிவு மாநாட்டில் கலந்துகொள்வதற்காக பிரதமர் மோடி, 10ஆம் தேதி பிரான்ஸ் சென்றடைந்தார். மறுநாள், பிரான்ஸ் அதிபர் இம்மானுவேல் மக்ரோனுடன் இணைந்து, 2025ஆம் ஆண்டு ஏ.ஐ. உச்சி மாநாட்டிற்கு தளைமை தாங்கினார். அம்மாநாட்டில் பல நாட்டுத் தலைவர்கள், ஏ.ஐ. வல்லுநர்கள் பங்கேற்றனர். ஏ.ஐ. உச்சி மாநாட்டில் பேசிய பிரதமர் மோடி, "ஏ.ஐ. தொழில்நுட்பத்தின் அற்புதமானது. எந்தவொரு புதிய தொழில்நுட்பத்தாலும் வேலைவாய்ப்பு பறிபோகாது. பாரீஸை தொடர்ந்து ஏ.ஐ. தொழில்நுட்பம் தொடர்பான அடுத்த சர்வதேச மாநாடு இந்தியாவில் நடத்தப்படும" என்றார். பின்னர், பிரான்ஸின் மார்சேயிலுள்ள மசார் குஸ் போர் கல்லறைக்குச் சென்று, முதல் மற்றும் இரண்டாம் உலகப் போர்களில் இறந்த வீரர்களுக்கு அஞ்சலி செலுத்தினார். மார்சேய் நகரில் கட்டப்பட்டுள்ள இந்திய துணைத் தூதரகத்தின் அலுவலகத்தை பிரான்ஸ் அதிபர் மக்ரோனுடன் இணைந்து திறந்து வைத்தார். பிரான்ஸில் தனது சுற்றுப்பயணத்தை முடித்துக்கொண்டு, புதன்கிழமை அதிபர் டொனால்ட் ட்ரம்பை சந்திக்க அமெரிக்காவின் வாஷிங்டன் டி.சி.க்கு சென்றார். அவருக்கு அமெரிக்க அரசாங்கம் சார்பாகவும், அமெரிக்க வாழ் இந்தியர்கள் சார்பாகவும் உற்சாக வரவேற்பளிக்கப்பட்டது.