ட்ரம்ப் அதிரடி! பாதகமா? சாதகமா?

‘புலி வருது... புலி வருது' கதையாக... உண்மையிலேயே புலி வந்து விட்டது. ஆம்! அதிரடிக்குப் பெயர்போன டொனால்ட் ட்ரம்ப், அமெரிக்காவின் 47வது ஜனாதிபதியாக ஜனவரி 20, திங்கள்கிழமை மீண்டும் ஆட்சிப் பொறுப்புக்கு வந்து, தனது அதிரடிகளை முதல் நாளிலேயே தொடங்கிவிட்டார்.

- தெ.சு.கவுதமன்

'கல்வி, வேலைவாய்ப்பு உள்ளிட்ட அனைத்திலும் அமெரிக்கர்களுக்கே முன்னுரிமை! அமெரிக்காவின் இறையாண்மையை காப்பாற்றி, வலுவான அமெரிக்காவை கட்டமைப்போம்!' என்ற கோஷத்தின் அடிப்படையில் தான் ட்ரம்ப் இரண்டாவது முறையாகத் தனது 78வது வயதில் அமெரிக்க ஜனாதிபதியாகத் தேர்வு செய்யப்பட்டுள்ளார். ட்ரம்ப் தனது முதல் பதவிக்காலத்திலேயே ஸ்ட்ரிக்ட் ஆபீஸராக செயல்பட்டதால், அமெரிக்காவில் வசிக்கும் வெளிநாட்டினர் மத்தியில் ஒருவித கலக்கத்தை ஏற்படுத்தியிருந்தார்.

குறிப்பாக, அமெரிக்காவுக்குள் அண்டை நாடுகளின் வழியாக சட்டவிரோதமாக ஊடுருவுவதைத் தடுப்பதற்கு பிரமாண்ட பாதுகாப்பு அரண்களை அமைத்தார். அந்த நடவடிக்கை சர்வதேச அளவில் பரபரப்பை ஏற்படுத்தி, பேசுபொருளானது. அமெரிக்கவாழ் வெளிநாட்டினர்களின் வேலைவாய்ப்பு விஷயத்தில் சட்டத்தை கடுமையாக்கப்போவதாக அறிவித்திருந்தார். தற்போது பதவியேற்ற முதல் நாளிலேயே அது தொடர்பான பல்வேறு அதிரடி அறிவிப்புகளை வெளியிட்டுள்ளார்! தங்கள் நாடுகளில் ஏற்படும் உள்நாட்டுப் பிரச்சனைகள், போர்கள் காரணமாக அகதிகளாக அமெரிக்காவுக்குள் மெக்ஸிகோ வழியாக, அமெரிக்காவுக்குள் தஞ்சமடையக் கோருபவர்கள், தங்கள் மீதான வழக்குகள் முடியும் வரை மெக்ஸிகோவில் காத்திருக்க வேண்டுமென்று அறிவித்துள்ளார். ட்ரம்பின் முந்தைய ஆட்சிக்காலத்திலும் இதுபோலவே தான் அவர் அறிவித்திருந்தார்.

அடுத்ததாக பைடனின் ஆட்சிக்காலத்தில், மெக்ஸிகோ வழியாக அமெரிக்காவுக்குள் தஞ்சமடைய நினைப்பவர்களுக்கு அனுமதி கொடுக்கப்பட்டது. அதன்பின் அவர்களிடம் விசாரணை நடத்தப்பட்டு, அவர்கள் பொய்யான தகவலைக் கொடுத்து நுழைந்திருப்பது தெரியவந்தால் நாட்டைவிட்டு வெளியேற்றப்பட்டனர். ஆனால் அதற்குள் ஓரிரு ஆண்டுகள் அமெரிக்காவில் வசித்திருப்பார்கள். அப்படி வசிப்பவர்களில், தீவிரவாத நடவடிக்கைகளில் ஈடுபடுபவர்களாக இருக்கும்பட்சத்தில், அது அமெரிக்காவின் இறையாண்மைக்கு ஆபத்தாகக்கூடும். எனவே அவர்களை அமெரிக்காவுக்குள் நுழையவிடாமல், மெக்ஸிகோவில் காத்திருக்கவைத்து, முழுமையான விசாரணைக்குப் பின்னரே அனுமதிக்கப்படுவார்கள் என்று ட்ரம்ப் அறிவித்துள்ளார். மெக்ஸிகோவிலிருந்து சட்டவிரோதமாக நுழைபவர்களைத் தடுப்பதற்காக அமெரிக்காவின் தென்பகுதியில் அவசரநிலை பிரகடனப்படுத்தப்படுவதாகவும் அறிவித்துள்ளார்.