பாசிச சக்திகளை அண்டவிடாத ஓர் எல்லைச்சாமியாக நம் முதல்வர் இருக்கிறார்!

தமிழக முன்னாள் அமைச்சர் தங்கபாண்டியனின் மகள், தற்போதைய நிதி அமைச்சர் தங்கம் தென்னரசின் சகோதரி, காவல் துறை முன்னாள் அதிகாரி சந்திரசேகரின் திருமதி என்கிற அடையாளங்கள் ஏதுமின்றி, தன்னளவில் ஒரு கவிஞராக, பேச்சாளராக, நாடக ஆளுமையாக எல்லோராலும் அறியப்படுபவர் தமிழச்சி தங்கப்பாண்டியன்.

- 

ஐந்து கவிதை நூல்கள், ஏழு கட்டுரை நூல்கள், ஒரு சிறுகதை நூல் மற்றும் சில மொழியாக்க நூல்களுக்கான சொந்தக்காரராக எழுத்துலகிலும் தடம்பதித்திருக்கும் இவர், தென்சென்னை மக்கள் விரும்புகிற நாடாளுமன்ற உறுப்பினராகவும் மக்கள் நலப் பணிகளைத் தொடர்ந்து ஆற்றி வருகிறார்.

எவ்வித பகட்டுமில்லாமல் அனைவர் மீதும் பாசத்தைப் பொழியும் கரிசல் காட்டுப் பூமியில் பிறந்த கவிஞருடனான இந்தச் சந்திப்பில், இவரது பன்முகப் பட்ட ஆளுமையைக் கண்டு பெரிதும் வியந்தோம். இனி, 'இனிய உதயம்' வாசகர்களுக்காக அந்த உரையாடல்;

நீங்கள் பிறந்த கரிசல் நிலமான மல்லாங்கிணறில் சுரக்கும் நினைவுகள் குறித்து...

என்னுடைய ஊரான மல்லாங்கிணறு, மிகக் குறிப்பாக கரிசல் மண், இன்றைக்கு நான் எழுதுகிற கவிதை, கட்டுரை, சிறுகதைகளாகட்டும் எல்லா படைப்பிற்கும் அடிப்படையாக இருப்பது அந்த ஊரும் கரிசல் நிலமும் தான். என்னுடைய 13, 14 வயது வரைக்கும் அங்கேயிருந்த அந்தக் கண்மாயில் குளித்து, பனைமரத்தில் நுங்கு சாப்பிட்டு, முழுக்க முழுக்கப் புழுதி, வெக்கை, அந்தக் கவுச்சி வாடையோடு திரிந்த நாட்கள், மண்ணில் சம்மணம் போட்டு ஓராசிரியர் பள்ளியில் ஒன்னாப்பு, மூனாம்பு பயின்ற அந்த நாட்கள்... இதுதான் எனக்கான மிக மிக சந்தோசமான நாட்களென்று சொல்வேன். என்னுடைய எல்லா விதமான வளர்ச்சிக்கும் உரமிட்டது அந்தச் சுதந்திரமான குழந்தைப் பருவம்தான்.

தங்களின் பள்ளிக் காலத்தில் நிகழ்ந்த மறக்க முடியாத சம்பவம் எது..?

விருதுநகரில் இருக்கிற சத்ரிய மகளிர் மேல்நிலைப் பள்ளியில் படித்தேன். அது பெருந்தலைவர் காமராசர் பிடிஅரிசித் திட்டத்தில் விருதுநகரில் தொடங்கிய பள்ளிகளில் அதுவுமொன்று. விருதுநகரில் இருக்கிற வணிகப் பெருமக்கள் அவர்களுடைய வியாபாரத்தில் வருகின்ற லாபத்தில் கொஞ்சத்தை எடுத்து, மகமைத் திட்டத்தின்கீழ் தொடங்கப்பட்டது இந்தப் பள்ளி.

அம்மா எவ்வளவுதான் கண்டிப்பானவராக இருந்தாலும், 12 மாடுகளை வைத்திருந்து, அதில் பாலைக்கறந்து விற்று, அந்தப் பணத்தை போஸ்ட் ஆபிசில் போட்டு வைத்து மிகச் சிக்கனமாக வாழ்ந்தவர்.