આ માગણી વાળી છે કે અજુગતી ?

પ્રેમસંબંધના પાયામાં છે વિશ્વાસ, એ તૂટે ત્યારે થતાં નુકસાનનું વળતર ચૂકવવાનું?

- ડૉ. મિતાલી સમોવા

તોડાયેલા વચનની કિંમત શું? એ તો જેણે ચૂકવવી પડી હોય એને પૂછો. ગુમાવેલા સમયનો ભાવ શું? જેણે ખરીદવો પડ્યો હોય એને પૂછો. સંબંધમાં સામાજિક-કાયદાકીય જવાબદારી જ જ્યારે મોટા ભાગના લોકોને ન સમજાતી હોય ત્યારે નૈતિક ફરજો તો સ્વયંભૂ નિભાવાય એવી અપેક્ષા જ કેવી રીતે રાખી શકાય? તો શું નૈતિક જવાબદારીનું કોઈ મૂલ્ય નથી? ભરોસા પર તો વહાણ તરતાં હોય છે ને...

વાત છે ધ ટેલિગ્રાફ અખબારની એક કૉલમમાં રજૂ થયેલા કિસ્સાની. આ કૉલમમાં લોકો પોતાની વ્યથા રજૂ કરે છે અને નિષ્ણાતોના અભિપ્રાય મેળવે છે. હમણાં એક યુવતીએ પોતાના ભૂતપૂર્વ પ્રેમી પાસે ગર્ભાધાન માટે આઈવીએફ સારવારનો ખર્ચ માગ્યો. યુવતીના કહેવા પ્રમાણે, એનો એના પ્રેમી સાથે છેલ્લાં દસ વર્ષથી પ્રેમસંબંધ હતો, લગ્નના વચન સાથે બન્ને એક ઘરમાં રહેતાં હતાં. એ જ આશા સાથે યુવતી પરિવાર વસાવવાના વચન પર ભરોસો કરીને પ્રેમી અને ઘરનું ધ્યાન રાખવા ઉપરાંત કરિયરમાં પણ સમાધાન કરતી રહી.