ભીંતે ભીંતે અંકિત છે પ્રકૃતિની પંક્તિ

ભરત કોરાટઃ અહીં માત્ર હું નહીં, વૃક્ષોની આખી દુનિયા વસે છે.

-  દેવેન્દ્ર જાની (રાજકોટ)

રાજકોટ શહેરના મધ્યમાં, શહેરી ગતિશીલતાની વચ્ચે, રેસકોર્સ નજીકની નાનકડી શેરીમાં વસેલું એક અનોખું ઘર, જ્યાં કુદરત પોતે વસવાટ કરે છે. જી હા, જેની સોસાયટીના પાંચ નંબરના આ બંગલાની બહારથી જ આંખો થંભી જાય એવાં ઘેઘૂર વૃક્ષો લહેરાય છે, જે ૪૨ ડિગ્રી સેલ્સિયસ તાપ વચ્ચે પણ શીતળ પવનનો અહેસાસ કરાવે છે.

આમ તો આ માત્ર ઘર નથી, પણ એક નાનકડી નૈસર્ગિક દુનિયા છે, જેમાં વસે છે પ્રકૃતિપ્રેમી ભરતભાઈ કોરાટ. એમણે ઘરને હરિત આશ્રમ બનાવી દીધો છે. લગભગ ૨૦૦ વારના આ બંગલાની ત્રણેય બાજુ પર જંગલી બદામ, વાંસ જેવાં વૃક્ષો ઉગાડી એમણે જાણે બે માળના મકાન પર મિયાણો બનાવી દીધો હોય એમ લાગે છે.