નવા હિંદુસ્તાનની ભીતરમાં...

વિકી કૌશલ-કે.કે. ના-ઓમ પુરી-પરેશ રાવલ: સોશિયલ મિડિયા પર જોશ તો બાકી બહુ હાઈ છે...

- રઘુ જેટલી

રઘુ આ લખવા બેઠો છે ત્યારે એનાં દિલદિમાગ પર વડા પ્રધાન નરેન્દ્ર મોદીનું રાષ્ટ્રજોગ પ્રવચન સવાર થયેલું છે. એનું (મીન્સ કે રઘુનું) ચાલે તો હમણાં બંધૂક લઈને પાકિસ્તાનને પાઠ ભણાવવા સરહદ પર દોડી જાય... ત્યાર બાદ એક સમાચાર પર એનું ધ્યાન જાય છે. ભારતના ભૂતપૂર્વ લશ્કરી વડા જનરલ એમએમ નરવણે સાહેબે પુણેમાં એવું કહ્યું: યુદ્ધ કંઈ રોમાન્ટિક કે બોલીવૂડ મૂવી નથી. (કોઈ પણ દેશનો) આ અતિગંભીર, ખર્ચાળ અને છેલ્લો ઉપાય છે...

પણ શું થાય? હાથમાં સ્માર્ટ ફોન ને સસ્તા ઈન્ટરનેટના કળિયુગમાં આપણે યુદ્ધને મસ્તીમજાકનો વિષય બનાવી મૂક્યું છે. ઑપરેશન સિંદૂર બાદ અને ૧૦ મેએ ભારત-પાકિસ્તાને યુદ્ધવિરામની જાહેરાત કરી એ બે ઘટના વચ્ચે ઈન્ટરનેટ પર જાતજાતનાં મસ્તીમજાક ચાલ્યાં. દાખલા તરીકે, યુદ્ધવિરામના થોડા જ સમય બાદ પાકિસ્તાન જાત પર ગયું ને છમકલાં કર્યાં, જેનો આપણી સેનાએ જડબાંતોડ જવાબ આપ્યો, એ પછી હૃતિક રોશનની લક્ષ્ય (૨૦૦૪) ફિલ્મનો એક સીન વાઈરલ થયો, જેમાં ઓમ પુરી (સૂબેદાર મેજર પ્રીતમસિંહ) કરન શેરગિલને (હૃતિકને) પાકિસ્તાનની અવળચંડાઈ વિશે સમજાવે છે.