સૌરાષ્ટ્રની કેસર પહોંચી ગઈ અમેરિકા!

ટ્રમ્પ સાહેબના ટેરિફયુદ્ધની વાતો વચ્ચે... ગીરની વાત નીકળે એટલે કેસર અને કેસરી (સિંહ) વિના વાત અધૂરી રહે છે. કેરીની સીઝન શરૂ થઈ ગઈ છે ત્યારે ગુજરાતીઓ જ નહીં, વિદેશીઓ પણ કેસર કેરીના આગમનની રાહ જોઈ રહ્યા છે. કેસરની સોડમ હવે અમેરિકા અને યુરોપના દેશો સુધી પહોંચી છે.

-  દેવેન્દ્ર જાની (રાજકોટ)

ઉનાળાના આરંભની સાથે જ કેરીની આવકનું કાઉન્ટડાઉન શરૂ થઈ જાય. ગુજરાતમાં કેરીની અનેક વરાઈટી જોવા મળે છે, પરંતુ ખુશબૂદાર કેસર કેરી સૌકોઈની પહેલી પસંદ બની છે. ગુજરાતીઓ તો કેસર કેરીના ચાહક છે જ, હવે વિદેશીઓને પણ કેસર કેરીનો ચસકો લાગ્યો છે. ગયા વર્ષે ગુજરાતનાં અલગ અલગ કેન્દ્રોમાંથી આશરે ૮૫૦ ટન કેસર કેરીની નિકાસ કરવામાં આવી હતી, એમાં પહેલો નંબર હતો અમેરિકાનો... અને આ વર્ષે તાલાલાથી વાયા અમદાવાદ થઈને કેસર કેરીનું પહેલું કન્સાઈનમેન્ટ એપ્રિલના મધ્યમાં જ અમેરિકા પહોંચી પણ ગયું છે!