સફળતાની સરગમ...

જીવનની તડકી-છાંયડી મૅચ કરીને રચી અક સમય ગામમા ગાયા ચરાવતા અન પછા આજીવિકા રળવા અમદાવાદમાં રિક્ષા ચલાવતા ‘અલબેલા’ ગાયક કૌશિક ભરવાડના એક ગીતે હમણાં સંગીતપ્રેમીઓને એ હદે ઘેલું લગાડ્યું છે કે એની પર હજારો રીલ્સ બની રહી છે. કળાકૌશલ ને કાનુડાની કૃપાથી આજે સેલિબ્રિટી બની ગયેલા આ કલાકારની ગઈ કાલ ભારોભાર સંઘર્ષથી ભરેલી છે.

- દેવેન્દ્ર જાની (રાજકોટ)

મારે કપડાં મૅચિંગ કરવાં છે... મારે મનડાં મૅચિંગ, દલડાં મૅચિંગ કરવાં છે...

આ શબ્દોના આજે લાખો દીલડાં દીવાના બન્યાં છે. મોબાઈલના રિંગટોનથી માંડી અનેક પરિવારોમાં રિંગ સેરેમનીના અવસરે હજારો રીલ્સ આ ગીતની ધૂન પર બની રહી છે, સોશિયલ મિડિયા પર લાખ્ખોની સંખ્યામાં સંગીતદીવાના એને જોઈ ચૂક્યા છે અને હજી જોઈ રહ્યા છે. આ વખતે નવરાત્રિમાં પણ આ સોન્ગ ભારે ધૂમ મચાવશે એ નિર્વિવાદ હકીકત છે.

આ ગીતના ગાયક કોશિક ભરવાડનો અવાજ આમ તો દસેક વર્ષથી ગુંજી રહ્યો છે, પણ આ કપડાં મૅચિંગ... ગીતે તો એમને રાતોરાત સેલિબ્રિટી બનાવી દીધા છે. જો કે બહુ ઓછા લોકો એ જાણતા હશે કે એ સાવ સામાન્ય પરિવારમાંથી આવે છે. અહીં સુધીનો એમનો પ્રવાસ જરાય સહેલો નહોતો અને એક સમયે એમને કલ્પના પણ નહોતી કે પોતાનો અવાજ ઘરે ઘરે સંભળાતો થશે.

આ યુવા ગાયકને કળા વારસામાં નથી મળી. કૌશિક ભરવાડ અમદાવાદ નજીક બાવળાના ભરવાડ સમાજના એક સામાન્ય પરિવારમાંથી આવે છે. ઘરની આર્થિક સ્થિતિ નબળી હોવાથી માત્ર ચાર ધોરણ સુધી જ ભણતર થયું. ગીત ગાવાનો શોખ એમને નાનપણથી હતો. મિત્રોની વચ્ચે એ ગામઠી લઢણમાં ગીતો ગાતા ત્યારે સૌ એમને પ્રોત્સાહન આપતા.

દ્વારકાધીશના પરમ ભક્ત કોશિકમાં પ્રતિભા છુપાયેલી હતી, પણ યોગ્ય મંચ મળતો નહોતો. વળી, ઘરની સ્થિતિ એવી કે એ દિશામાં વિચારવાનો સમય પણ નહોતો. શરૂઆતમાં અમદાવાદમાં એસ.જી. (સરખેજ-ગાંધીનગર) હાઈ-વે પર એમણે રિક્ષા ચલાવી. ૨૦૧૨થી ત્રણેક વર્ષ ઉજાલા સર્કલથી ગોતાના પટ્ટાવિસ્તાર પર એ રિક્ષા ચલાવતા. ૨૦૧૪માં બાવળામાં ભરવાડ સમાજના એક કાર્યક્રમમાં જાહેર મંચ પર ગાવાની તક મળી. એ પછી જાહેર કાર્યક્રમોમાં ગાવાનાં આમંત્રણ મળતાં ગયાં. દિવસે રિક્ષા ચલાવવાની ને રાત્રે ગીત-સંગીત કાર્યક્રમ.