જુવાન દીકરીને જોખમ સમયે મદદ કરે એવી કોઈ ઍપ ખરી?

ઘરનાં મહિલા સદસ્યોના ફોનમાં આમાંથી કોઈ એક ઍપ અને આ બન્ને હેલ્પલાઈન નંબર છે કે નહીં એ આજે જ ચેક કરજો...

- પુનીત આચાર્ય સોમપુરા

ડિજિટલ દુનિયાના વાચકમિત્રોએ પૂછેલા અને અમે ચૂંટેલા કેટલાક પ્રશ્નોના ઉત્તર આ સાથે પ્રસ્તુત છે...

પ્રશ્નઃ એમેઝોન કે ફ્લિપકાર્ટ પર પ્રોડક્ટનાં જે રિવ્યૂ અને રેટિંગ દેખાય છે એ સાચાં હોય છે?

ઉત્તરઃ સારાં રિવ્યૂ અને રેટિંગ જોઈને ખરીદેલી પ્રોડક્ટમાં તમે છેતરાયા છો તો એની પાછળ એક મોટું સ્કેન્ડલ હોય એ શક્ય છે અને તમારી શંકા ખોટી હોવાના ચાન્સ બિલકુલ ઓછા છે. એનું કારણ એ છે કે હમણાં જ ફેડરલ ટ્રેડ કમિશન નામની અધિકૃત અમેરિકન ઑથોરિટીએ ઑનલાઈન પ્લૅટફૉર્મ્સ પર ખોટી રીતે રિવ્યૂ અને રેટિંગ કરવા-કરાવવા વિશે વેપારીઓને ચેતવ્યા છે અને કડક નિયમો અને દંડની જોગવાઈ કરી છે. અમેરિકામાં આ ટૉપિક અત્યારે જોરદાર ચગ્યો છે.

અમેરિકામાં આવું ચાલતું હોય તો આપણા દેશમાં એમેઝોન, ફ્લિપકાર્ટ કે એ પ્રકારનાં બીજાં પ્લૅટફૉર્મ્સ પર દેખાતાં રિવ્યૂ કે રેટિંગ સાચાં હશે કે ખોટાં એની તો આપણે કલ્પના જ કરવાની રહી.

પ્રશ્નઃ મોબાઈલ ફોનમાં ઈન્સ્ટૉલ કરી શકાય એવી કોઈ ઍપ ખરી કે જે મારી યુવાન દીકરીની સલામતી માટે ઉપયોગી રહે?