બાળકોની દુશ્મન બની આ ચાંદી...

ગુજરાતમાં ‘ચાંદીપુરા’ વાઈરસથી ૩૨ બાળક મોતને ભેટ્યાં. નાનકડી માખીથી ફેલાતા આ વિષાણુથી સાવધાન રહેવામાં જ સમજદારી છે.

- મહેશ શાહ (અમદાવાદ)

ગુજરાતમાં થોડા દિવસથી ગાજતું આ નામ કોઈ ગામ કે વિસ્તારનું નહીં, પણ એક વાઈરસનું છે. મૂળ ૧૯૬૫ના અરસામાં મહારાષ્ટ્રના ચાંદીપુરા ગામમાં જોવા મળેલા વાઈરસને ચાંદીપુરા ગામનું જ નામ અપાયું હતું. પછીનાં વર્ષોમાં અને અત્યારે પણ ગુજરાતમાં ચોમાસામાં, ખાસ કરીને ગ્રામીણ વિસ્તારોમાં આ વાઈરસે દેખા દીધી છે.

રાજ્યમાં એક મહિનાથી ઓછા સમયમાં આ વાઈરસે ૩૨ ભૂલકાંનો ભોગ લીધો. હાલ ૮૨ બાળદરદી સારવાર હેઠળ છે. આમ તો દર ચોમાસામાં મેલેરિયા, ડેન્ગ્યુ, ચિકનગુનિયા, વગેરેનો ઉપદ્રવ જોવા મળે, જે જુદા જુદા મચ્છરોથી ફેલાય છે. બીજી તરફ, ચાંદીપુરા વાઈરસની વાહક છે સૅન્ડ ફ્લાય પ્રકારની માખી. સામાન્ય માખી કરતાં ઘણી નાનીએવી આ સૅન્ડ ફ્લાય માખી મહદંશે છાણાં-લીંપણવાળા ઘરની દીવાલની તિરાડ અને ભેજવાળા વાતાવરણમાં ઈંડાં મૂકે. એનાથી ફેલાતા વાઈરસનો ભોગ એકથી ૧૪ વર્ષનાં બાળકો બને.