અનવૉન્ટેડ બાળક પેદા જ ન થાય તો?

પોતાની મરજીથી ગર્ભધારણ કર્યા પછી સ્ત્રીનો વિચાર બદલાઈ જાય ત્યારે...

- ડૉ. મિતાલી સમોવા

સ્ત્રીનો પોતાના શરીર પર કેટલો અધિકાર છે? એના કૌમાર્ચથી માંડી એણે કોની સાથે સંબંધ બાંધવો? ગર્ભ રાખવો કે નહીં? બાળકો પેદા કરવાં કે નહીં? કેટલાં બાળક પેદા કરવાં? ક્યારે કરવાં? કયા લિંગનાં પેદા થવાં? જેવા અનેક સવાલ પુછાઈ રહ્યા હોય ત્યારે સૌથી પહેલો પ્રશ્ન તો એ જ ઊભો થાય કે સ્ત્રીના શરીર પર એનો પોતાનો હક છે કે એના પરિવારનો? એ જે સમાજ કે સમુદાયની છે એનો કે આખા દેશનો? અને આ સવાલ આપણે ત્યાં જ છે એવું નથી. દુનિયાભરમાં જાતિ, ધર્મ, વર્ગ અને પિતૃસત્તાનાં મૂળિયાં સ્ત્રીના શરીર પર સમાજ-પરિવારના કહેવાતા અધિકારના આધારે રચાયાં છે. એમ જુઓ તો જેનું શરીર છે એના પર સૌથી પહેલો અને એકમાત્ર અધિકાર એનો પોતાનો હોય એ તાર્કિક રીતે સીધીસાદી વાત લાગે, પરંતુ ખરેખર આ તર્ક સાચો છે ખરો કે પછી ભૂલભરેલો છે?

ભારત સહિત દુનિયાભરમાં આ જ કારણોસર સ્ત્રીઓ માટે ગર્ભપાત એટલે કે અબોર્શનના કાયદા હંમેશાં દુવિધાથી ભરેલા રહ્યા છે. જે દેશોમાં વસતિ ઓછી થઈ રહી છે ત્યાં આધુનિક યુગમાં બાળકો ન પેદા કરતી યુવતીઓ માટે અબોર્શનને ગુનો ગણીને અવનવાં ધાર્મિક અને સાંસ્કૃતિક કારણો આગળ ધરી એના પર બંધન મૂકવામાં આવ્યાં છે.