રૂંવે રૂંવે દઝાડતી બેદરકારી...

ગુજરાત જ નહીં, પણ દેશભરમાં ચકચાર જગાવનાર રાજકોટ ગેમ ઝોન જેવી ઘટના ફરી ન બને એ માટે શું કરી શકાય?

- કેતન મિસ્ત્રી (મુંબઈ)

માસૂમ બાળકો સહિત ૨૮ લોકોનાં મોત બાદ હવે તમને ખબર પડી કે શહેરમાં ગેમિંગ ઝોન વગર પરવાનગીએ ચાલે છે? ગેમિંગ સેન્ટર અનધિકૃત પરિસરમાં બનાવવામાં આવેલો અને એની પાસે ફાયર સેફ્ટીનું નો ઓબ્જેક્શન સર્ટિફિકેટ (એનઓસી) પણ નહોતું. આ બધું ચાર વર્ષથી ચાલી રહ્યું હતું... તો શું તમે ઊંઘતા હતા? હવે અમને નગર પ્રશાસન પર બિલકુલ ભરોસો નથી. આ દુર્ઘટના આંખ ઉઘાડનારી છે.

રાજકોટના ટીઆરપી ગેમ ઝોનની દુર્ઘટનાના મુદ્દે સોમવાર, ૨૭ મેએ ગુજરાત હાઈ કોર્ટના જસ્ટિસ બીરેન વૈષ્ણવ અને જસ્ટિસ દેવેન દેસાઈની બનેલી બેન્ચે આવાં ધારદાર નિરીક્ષણ કર્યાં.

હાલ દેશભરમાં ત્રણ આગની ઘટનાના સમાચાર પ્રજાને દઝાડી રહ્યા છેઃ રાજકોટના ટીઆરપી ગેમ ઝોનની આગમાં ત્રીસથી વધારેનાં મોત. એ પહેલાં મુંબઈની પાદરે આવેલા ડોમ્બિવલીની કેમિકલ ફેક્ટરીના બૉઈલરમાં આગ ફાટી નીકળતાં છનાં મોત અને રાજકોટ કરુણાંતિકાની રાતે નવી દિલ્હીની એક ખાનગી હૉસ્પિટલની આગમાં સાત નવજાત શિશુનાં મોત. એવાં શિશુ, જેમનાં હજી તો નામકરણ પણ થયાં નહોતાં!

રાજકોટ આગની વાત કરીએ તો, એવું સામે આવ્યું કે ગેમ ઝોનમાં પ્રવેશતાં પહેલાં સંચાલકો એક મોત-પત્રક (તો બીજું શું?) ભરાવતા હતા કે અંદર કંઈ પણ અઘટિત બનશે તો સંચાલકો સામે કાયદેસર પગલાં લઈ શકાશે નહીં. કેમ કોઈ આલા સરકારી અધિકારીએ આ ફૉર્મ વાંચ્યું નહીં? કેમ સામે એમની પાસે લખાવવાની ફરજ પાડવામાં ન આવી કે અમારો ગેમ ઝોન તમામ સરકારી ધારાધોરણ, મંજૂરીને આધીન ચાલે છે ને એમાં સુરક્ષાનાં તમામ સાધન છે. શું આંખે મોતિયો હતો? ના. આલા અફસરોને ખબર હતી કે બધું લોલંલોલ છે, ગેમ ઝોન પમિશન વગર ચાલે છે.

અચ્છા, આલા અફસરોએ ટેમ્પરરી એટલે કે કામચલાઉનો અર્થ શાળા-કૉલેજ કે યુપીએસસીના અભ્યાસક્રમમાં ક્યારેય ભણ્યો નહીં હોય? ધારો કે કોઈ મેદાન પર ભાગવત્ સપ્તાહ બેસાડે ને મંડપ બાંધે તો અમુક દિવસ બાદ એ પંડાલ અથવા ટેમ્પરરી સ્ટ્રક્ચર તોડી પાડવાનું હોય. ચાર-ચાર વર્ષ એ ટેમ્પરરી કેવી રીતે કહેવાય?