ડાયાબિટીસ કાબૂમાં રાખવા સ્વીટનર ખાવ છો? તો તમે ખાંડ ખાવ છો!

મીઠી સાકરની બીમારી હોય તો સાકરને બદલે ઘણા લોકો સ્વીટનર પર પસંદગી ઉતારે છે. એમાંય હવે તો સ્ટિવિયા વનસ્પતિનો સ્વીટનરમાં ઉપયોગ થવા લાગ્યો છે. જો કે બધું પીળું સોનું હોતું નથી એમ ભેળસેળને કારણે સ્ટિવિયામાંથી બનતી બધી ચીજો આરોગ્યપ્રદ હશે એમ માની લેવાની ભૂલ કરવા જેવી નથી.

- કૌશિક મહેતા

ડિયર નૅચર,

અમારા એક મિત્ર શાળા સંચાલક છે. અમારા બન્ને પરિવાર સાથે જમવા ગયા હોય અને સંચાલક મિત્ર જો વધુ મીઠાઈ ખાય તો એની દીકરી તરત ટોકેઃ પપ્પા, હવે રહેવા દો... એ મિત્રને હજી તો ડાયાબિટીસની વ્યાધિ નથી, પણ દીકરી કહે છે કે ધ્યાન રાખવું જોઈએ કે એ ના આવે... ડાયાબિટીસ ન આવે એનું ધ્યાન રાખવું જોઈએ, પણ આવી ગયું તો શું? આ રોગ માત્ર રાજરોગ નથી, ભારતમાં તો હવે આ આમ રોગ બની ગયો છે. દેશમાં બહુ વે છે. આની માં એવા પરિવાર એવા નર જ્યાં ઘરના કોઈ સભ્યને ડાયાબિટીસ ન હોય. વળી, આ રોગ થાય એટલે બાકીની અનેક બીમારીને આવવાનું આમંત્રણ મળી જાય છે.

ડાયાબિટીસ વધી જાય તોય સમસ્યા થાય છે અને લોહીમાં સાકરનું પ્રમાણ ઘટી જાય તો તો ઔર સમસ્યા થાય છે. ટૂંકમાં, ડાયાબિટીસ કાબૂમાં રહે એ જરૂરી છે અને એને કાબૂમાં રાખવા માટે આપણે શું શું નથી કરતા? ડૉક્ટરો એ માટે દવા લખે છે અને રોજ મીઠાઈથી દૂર રહો... એવી બધી સલાહ આપે છે, પણ જેને આ રોગ હોય એની સમસ્યા સવારથી જ શરૂ થઈ જાય છે. સવારના નાસ્તા સાથે ચા પીવી હોય તો એ સાવ ઓછી ખાંડવાળી હોવી જોઈએ અથવા તો ખાંડ વિનાની હોવી જોઈએ. મોળી ચા તો ભાવે નહીં એટલે સાકરના વિકલ્પોની શોધ શરૂ થાય છે અને એ શોધ ગોળથી શરૂ કરી આર્ટિફિશિયલ સ્વીટનર સુધી ચાલે છે. જેટલાં મોઢાં એટલી વાત. ગોળ બીજી રીતે સારો હશે, પણ ડાયાબિટીસ માટે તો સારો નહીં જ. એટલે વિકલ્પ મોટા ભાગે એક જ બચે છેઃ આર્ટિફિશિયલ સ્વીટનર.

જે ઘરમાં ડાયાબિટીસના પેશન્ટ હોય ત્યાં દવા સાથે ઘરના ટેબલ પર કોઈ ને કોઈ સ્વીટનર જરૂર જોવા મળે છે. એ લેવાથી ડાયાબિટીસના દરદીઓ રાહત અનુભવે છે કે હવે એમની બીમારી કાબૂમાં રહેશે. હશે, કાબૂમાં રહેતી હશે, પણ એ સ્વીટનરની ઘણી આડઅસર થાય છે એનું શું? અહીંથી બીજી માથાકૂટ શરૂ થાય છે. કયું સ્વીટનર લેવું એની. કેમિકલવાળાં સ્વીટનર પણ આવે છે અને પ્રાકૃતિક સ્વીટનર પણ આવે છે. એમાંથી શેની પસંદગી કરવી?