નયા હિંદુસ્તાન... નયા સિનેમા!

દેશમાં ચૂંટણીનો માહોલ જામ્યો છે ત્યારે એક નજર ઈલેક્શન્સ પહેલાં આવેલી અને હવે આવનારી કેટલીક પોલિટિકલ ફિલ્મો પર.

- કેતન મિસ્ત્રી (મુંબઈ) 

ધડામ... એક પ્રચંડ બૉમ્બધડાકો, અગનજ્વાળામાં લપેટાયેલો પર્વત, બ્લાસ્ટથી હવામાં ફંગોળાયેલી કેટલીક બસ અને એક અદશ્ય અવાજઃ યે એક નયા રણ હૈ ઔર ઈસે જીતને કે લિયે એક નયી રણનીતિ કી જરૂરત હે... સંતોષસિંહ દિગ્દર્શિત રણનીતિઃ બાલાકોટ ઍન્ડ બિયોન્ડ નામની વેબ-સિરીઝનું એક દૃશ્ય. ચિત્રલેખાનો આ અંક આપના હાથમાં હશે ત્યારે આ સિરીઝ જિયો સિનેમા પર આવી ગઈ હશે. કલાકારો છેઃ જિમી શેરગિલ, આશુતોષ રાણા, લારા દત્તા, આશિષ વિદ્યાર્થી, વગેરે.

 દિગ્દર્શક રંજન ચડેલની ધ સાબરમતી રિપોર્ટ એ ૨૦૦૨માં સાબરમતી એક્સપ્રેસ ટ્રેનમાં લાગેલી આગ પાછળનું સત્ય શોધતા પત્રકારત્વની વાત છે. રાશિ ખન્ના અને ટ્વેલ્થ ફેઈલવાળો ફાંકડો ઍક્ટર વિક્રાંત મેસી છે. આ ફિલ્મ ત્રણ મેએ રિલીઝ થવાની હતી, પણ હવે ઓગસ્ટમાં રિલીઝ થશે.

ડિરેક્ટર એમ.કે. શિવઆકાશની એક્સિડન્ટ ઑર કન્સ્પિરસીઃ ગોધરામાં એ કમનસીબ ઘટનાની તપાસ માટે નિમાયેલા નાણાવટી શાહ મહેતા પંચના અહેવાલ પર આધારિત છે. રણવીર શૌરિ, મનોજ જોશી, હિતુ કનોડિયા અને રાજીવ સુરતી જેવા કલાકારોને ચમકાવતી આ ફિલ્મનો એકમાત્ર ઉદ્દેશ છે સત્ય શોધવાનોઃ શું એ એક કમનસીબ અકસ્માત હતો કે પૂર્વનિયોજિત કાવતરું? ફિલ્મ માર્ચમાં રિલીઝ થવાની હતી, પણ ગોધરાના પ્રવાસમાં હજી પહેલો પડાવ, સેન્સર સર્ટિફિકેટ જ મળ્યું નથી. હવે કદાચ ચુનાવ પછી રિલીઝ થશે.

હવે જરા આ શીર્ષક જુઓઃ ધ ડાયરી ઑફ વેસ્ટ બેંગાલ, ધ યુપી ફાઈલ્સ, જેએનયુઃ જહાંગીર નૅશનલ યુનિવર્સિટી, વગેરે વગેરે.

મુદ્દો એ કે ઈલેક્શનની પહેલાં અને પછી સત્ય રાજકીય ઘટનાઓ આધારિત ફિલ્મોની ભરમાર લાગી છે અથવા લાગવાની છેઃ જવાન (જેની ક્લાઈમેક્સમાં શાહરુખ મતદાન કેવી રીતે કરવું એની સુફિયાણી સલાહ એક સ્પીચમાં આપે છે) અને ફાઈટર ઉપરાંત વેક્સિન વૉર, ઑપરેશન વૅલેન્ટાઈન, યોદ્ધા, આર્ટિકલ ૩૭૦, બસ્તરઃ ધ નક્સલ સ્ટોરી, સેમ બહાદુર, મેં અટલ હૂં, સ્વાતંત્ર્ય વીર સાવરકર, વગેરે.

વિશેષ તો, બાલાકોટ ઍરસ્ટ્રાઈકની ઘટનામાં સર્જકોને ઘણો રસ પડ્યો છે. ૨૦૧૯માં પુલવામા ખાતે સેન્ટ્રલ રિઝર્વ પોલીસ ફોર્સની ટુકડી પર જૈશ-એ-મોહમ્મદના આત્મઘાતી હુમલાખોરો દ્વારા કરવામાં આવેલા હુમલામાં ૪૦ સૈનિકો મૃત્યુ પામ્યા હતા. આ વર્ષે આનો પહેલો બદલો લીધો ફાઈટ૨ે. ત્યાર બાદ ઑપરેશન વૅલેન્ટાઈન, અને હવે આ નવી વેબ-સિરીઝઃ રણનીતિ...