સર્વાઈલ કેન્સરઃ ઝડપી નિદાન છે અક્સીર ઈલાજ નો માર્ગ

ગર્ભાશયના મુખમાંથી કર્ક રોગના કોષ પકડવાનું કામ કરતી પેપ સ્મિયર ટેસ્ટ વિશે આ જાણી લો...

- ડૉ. અર્ચના પારસ શાહ

કેન્સરનું નામ પડતાંવેંત શરીરમાંથી ભયનું લખલખું પસાર થઈ જાય એ સ્વાભાવિક છે. કૅન્સર શરીરનાં કોઈ પણ અંગમાં થઈ શકે છે. સ્ત્રીને કનડતા કર્ક રોગના પ્રકારની વાત કરીએ તો, ગર્ભાશયના મુખ (સર્વિક્સ)માં થતા કૅન્સરને સર્વાઈકલ કૅન્સર કહે છે. સર્વાઈકલ કૅન્સર એ ૧૫થી ૪૪ વર્ષની મહિલાઓમાં સૌથી વધુ જોવા મળતો કૅન્સરનો પ્રકાર છે. જો કે આપણે ત્યાં એ વિશે જાગરૂકતા અને એની તપાસનું પ્રમાણ અત્યંત નહીંવત્ છે.

સર્વાઈકલ કૅન્સર એ સંપૂર્ણપણે મટી શકે એવો રોગ છે. કારણ એ કે એને અસાધ્ય તબક્કા સુધી પહોંચવામાં સમય લાગે છે. આ ઉપરાંત, એનાં ચોક્કસ લક્ષણોને કારણે સામાન્ય તપાસ અને ફેરતપાસ દ્વારા એનું નિદાન શક્ય બને છે. કમનસીબે ભારતમાં મહિલાઓનો ઘણો મોટો વર્ગ સર્વાઈકલ કૅન્સરની સંભાળ માટેની સ્ક્રીનિંગ પ્રક્રિયા વિશે અજાણ છે. રસીકરણ, સ્ક્રીનિંગ અને સારવારની મદદથી તાજેતરમાં વિશ્વ આરોગ્ય સંસ્થા (હુ)એ ૨૦૫૦ સુધીમાં આ પ્રકારના કૅન્સરના નવા કેસમાં ૪૦ ટકા અને સર્વાઈકલ કૅન્સર સંબંધિત મૃત્યુના આંકમાં ૫૦ લાખના ઘટાડાનું લક્ષ્ય નિર્ધારિત કર્યું છે.