જ્યારે પુત્રનું લોહી બોલી ઊઠ્યું...જન્મદાત્રી છે મારી હત્યારી

તાજેતરમાં બેંગલુરુની એક માતાએ પોતાના ચાર વર્ષના પુત્રની ગોવામાં હત્યા કરી હોવાના સમાચાર દેશઆખાને ખળભળાવી ગયા. માતાની ધરપકડ બાદ દરરોજ એક નવી, ચોંકાવનારી હકીકત સામે આવતી જાય છે ત્યારે જઈએ આવા ઘૃણાસ્પદ ગુનાની ભીતરમાં..

- કેતન મિસ્ત્રી

એક પુરાણી કહેવત છેઃ છોરું કછોરું થાય, માવતર કમાવતર ન થાય... ૨૦૨૪ના આરંભે ૩૯ વર્ષની સૂચના સેઠે આ કહેવત ખોટી પાડી. અમેરિકાની પ્રતિષ્ઠિત વિદ્યાપીઠમાં ભણેલી, સંસ્કૃતની જ્ઞાતા તથા બેંગલુરુમાં સ્ટાર્ટ-અપ કંપની ધરાવતી સૂચના પર પોતાના ચાર વર્ષી પુત્રની હત્યાનો આરોપ છે.

જે વાચકોને આ ઘટના વિશે ખબર નથી એમને માટે ટૂંકસારઃ મૂળ કોલકાતાની, પણ બેંગલુરુમાં સ્થિર થયેલી સૂચના સેઠનો એના પતિ વેંકટ રમણ સાથે છૂટાછેડાનો કેસ ચાલી રહ્યો છે. દંપતીને ચાર વર્ષનો એક પુત્ર છે. છ જાન્યુઆરીએ સૂચના પુત્રને લઈને બેંગલુરુથી ગોવા જઈ એક હોટેલમાં ઊતરે છે. બે દિવસ બાદ એ પરત જવાનું નક્કી કરે છે.ગોવાના ડેબોલિમ ઍરપોર્ટથી માંડ કલાકમાં બેંગલુરુ પહોંચાડતી ફ્લાઈટ લેવાને બદલે એ બાર-તેર કલાકનો થકવી નાખતો મોટરપ્રવાસ પસંદ કરે છે.  ઍપાર્ટમેન્ટનો સ્ટાફ ટૅક્સીની ગોઠવણ કરી આપે છે. ડ્રાઈવર બૅગ ડિકીમાં મૂકી ટૅક્સી હંકારી મૂકે છે.

પુત્રનો કબજો પતિને આપવો એના કરતાં એને (પુત્રને) આ દુનિયામાંથી વિદાય આપી દેવી... સૂચનાએ બીજો વિકલ્પ પસંદ કર્યો.

આશરે છસ્સો કિલોમીટરનો પ્રવાસ શરૂ થાય છે. ડ્રાઈવર પોતાની સાથે એક સ્પેર ડ્રાઈવર પણ લે છે, જેથી વચ્ચે ઊંઘ ખેંચવી હોય તો ખેંચી શકાય. કર્ણાટકની હદમાં જસ્ટ પ્રવેશ પહેલાં હાઈવે પર ટ્રાફિક જામ સર્જાયો છે. ડ્રાઈવર કહે છેઃ ‘મૅડમ, આમાં તો પાંચ-છ કલાક નીકળી જશે. હું ગાડી પાછી વાળી લઉં, તમે ગોવા ઍરપોર્ટથી ફ્લાઈટ લઈ લો. ઝટ પહોંચી જશો.’

જો કે સૂચના એ માટે તૈયાર નથી. થોડી વારમાં ડ્રાઈવરનો મોબાઈલ રણકે છે. સામે છેડે ગોવા પોલીસના અધિકારી છે. એ જાણવા માગે છે કે ટૅક્સીમાં સ્ત્રી પેસેન્જર સાથે કોઈ બાળક છે કે નહીં? ડ્રાઈવર કહે છે: ના. એ તો એકલાં જ છે. ગોવાથી નીકળ્યાં ત્યારથી એકલાં જ છે... એક કામ કરો. હું મૅડમને ફોન આપું છું, તમે એમની સાથે જ વાત કરી લ્યો.'

પોલીસ અધિકારી સૂચનાને પૂછે છેઃ ‘તમે ગોવા આવ્યાં ત્યારે તમારો દીકરો સાથે હતો ને? એ ક્યાં છે?’

સૂચના કહે છેઃ ‘એ ગોવામાં અમારા રિલેટિવને ત્યાં છે. થોડા દિવસ એમની સાથે રહેશે.’