છોટા સા ઘર હૈ, મગર...

ટ્રેનના ડબ્બાની પહોળાઈ પણ ખૂબ મોટી લાગે એવાં ઘરોમાં છે આ સુરતી ખારવાઓના બસેરા.

- અરવિંદ ગોંડલિયા

 ન્યૂ યોર્કના એલેક્ઝાન્ડ્રિયા પાસે દુનિયાનો ન્યુ સૌથી નાનો, ૩૩૦૦ સ્ક્વેર ફૂટનો જસ્ટ રૂમ ઈનફ નામનો આઈલૅન્ડ છે, જ્યાં માત્ર એક ઘર અને એક ઝાડ છે. દિલ્હીમાં છ ગજની જમીનમાં ત્રણ માળનું મકાન ઊભું કરવામાં આવ્યું છે, જે ભારતનું સૌથી નાનું ઘર હોવાનો દાવો કરાય છે. જો કે સુરતમાં પણ આવાં જરા હટકે ઘર ઘણાં છે!

ગલીમાં તો ઘર હોય, પણ ઘર જ ગલી જેવું હોય ખરું? સામાન્ય ગલીની પહોળાઈથી પણ નાનાં ઘરો સુરતના એક વિસ્તારમાં છે. ત્રણથી ચાર ફૂટની પહોળાઈનાં આવાં ઘરોમાં અનેક પરિવારો રહે છે.

ડબલ બેડ તો છોડો, બે ખુરસી પણ સામસામે ના ગોઠવી શકાય. અહીં પંખાની સાઈઝ પણ નૉર્મલ કરતાં નાની છે. આ ઘરની અંદર પ્રવેશ કરો તો કોઈ નવી જ દુનિયામાં પ્રવેશી ગયા હો એવું લાગે!