બાળકને જન્મ આપ્યા બાદ શું ધ્યાન રાખશો?

ગર્ભાવસ્થાની જેમ જ પોસ્ટ-પાર્ટમ પિરિયડમાં પણ સ્ત્રી પૂરતી કાળજી લે એ જરૂરી છે.

- 

કોઈ પણ મહિલાના જીવનમાં બાળકને જન્મ આપવાનો પ્રસંગ એ એના જીવનની અતિ મહત્ત્વની ઘટના છે. આમ પણ આ એક નવસર્જનની પ્રક્રિયા છે એટલે પ્રસૂતિ પહેલાં સ્ત્રીએ પોતાની જેટલી કાળજી રાખવી જરૂરી છે એટલી જ સંભાળ પ્રસૂતિ બાદ પણ રાખવી આવશ્યક છે.

પ્રસૂતિ પછીનાં પ્રથમ છ સપ્તાહને પોસ્ટ-પાર્ટમ પિરિયડ કહે છે.સ્વાભાવિક રીતે જ આ સમયગાળો માતા બનનારી મહિલા ઉપરાંત એના પરિવારજનો માટે અત્યંત આનંદ-ઉલ્લાસનો હોય છે. જો કે આ સમય માતા માટે નવી સ્થિતિમાં ઍડ્જસ્ટ થવાનો તથા પ્રસવકાળ દરમિયાન થયેલી શારીરિક, માનસિક પીડામાંથી બહાર આવવાનો પણ છે. આ પ્રારંભિક સપ્તાહો દરમિયાન મહિલા એના બાળક સાથે માતૃત્વના ભાવથી સંકળાય છે.

બાળકના જન્મ પછી રોજિંદા જીવનમાં ઍડ્જસ્ટ થવું એ એક અલગ પડકાર છે, ખાસ તો સ્ત્રીનું પ્રથમ બાળક હોય ત્યારે. બાળકની સંભાળ રાખવી મહત્ત્વપૂર્ણ હોવાની સાથે સાથે જ સ્ત્રીએ પોતાની સંભાળ પણ લેવી પડશે.